އެއްފަހަރު ބޭނުންކޮށްފައި އުކާލާ ގޮތަށް އުފައްދާފައިވާ ޕްލާސްޓިކް ފުޅީގައި ކާބޯތަކެތި ބަންދުކޮށްގެން ވިއްކުމަކީ ސިއްހީ ބޮޑު ނުރައްކަލެއް އޮތް ކަމެއް ކަމަށް ބުނެ، އެކަން އެގޮތަށް ނުކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އަންގައިފިއެވެ.
އެ އޮތޯރިޓީން ނެރުނު ބަޔާނެއްގައި ބުނެފައިވަނީ، ބޯފެނާއި ލުއި ބުއިންތައް ހުސްކޮށްފައިވާ ފުޅިތައް އަލުން ބޭނުންކޮށްގެން ކާބޯތަކެތީގެ ވިޔަފާރިކުރާ ފަރާތްތަކުން ތަފާތު ބުއިންތައް ބަންދުކުރަމުންދާކަން ފާހަގަކުރެވިފައިވާ ކަމަށެވެ. މި ފުޅިތަކަކީ ޕޮލިއެތިލީން ޓެރަތަޔަލޭޓް (PET) ބޭނުންކޮށްގެން، ހަމައެކަނި ވަކި ބާވަތްތަކެއް ބަންދުކުރުމަށް ތައްޔާރުކޮށްފައިވާ އެއްޗެއްކަން އެ އޮތޯރިޓީން ފާހަގަކޮށްފައިވެ އެވެ.
އެމްއެފްޑީއޭ އިން ބުނި ގޮތުގައި، މިފަދަ ފުޅިތައް ތަކުރާރުކޮށް ބޭނުންކުރުމުގެ ސަބަބުން ޕްލާސްޓިކްގެ އަސަރު ފުޅީގައި ހުންނަ ކާބޯތަކެއްޗަށް ކުރުމުގެ ފުރުސަތު ބޮޑެވެ.
"މިއީ އޭގެ ޒަރިއްޔާއިން އިންސާނުންގެ ސިއްހަތަށް ނޭދެވޭ އަސަރުކުރުމުގެ ފުރުސަތު އޮތް ކަމެއް،" އެ އޮތޯރިޓީގެ ބަޔާނުގައި ބުނެފައިވެއެވެ.
މި މައްސަލައާ ގުޅިގެން އެމްއެފްޑީއޭ އިން ވަނީ ބޯފެނާއި ލުއިބުއިންތައް ހުސްކުރި PET ފުޅިތައް ކާބޯތަކެތި ބަންދުކުރުމަށް ބޭނުން ނުކުރުމަށް އަންގާފައެވެ.
