އެމްޓީސީސީގެ ރާއްޖެ ޓްރާންސްޕޯޓް ލިންކް (އާރުޓީއެލް) ގެ ޚިދުމަތް ޒޯން 4 ގައި ހިމެނޭ ދ. އަތޮޅާއި ފ. އަތޮޅުގެ ދަތުރުތަކަށް ނަގާނެ އަގުތައް ޓްރާންސްޕޯޓް މިނިސްޓްރީން މިއަދު އާއްމުކޮށްފި އެވެ.
ސަރުކާރުގެ ގެޒެޓުގައި ޝާއިއުކޮށްފައިވާ އިއުލާނުގައި ވަނީ ދ. އަތޮޅާއި ފ. އަތޮޅުގެ އެތެރޭގެ ދަތުރުތަކުގެ އިތުރުން، މި ދެ އަތޮޅު ގުޅުވައިދޭ ދަތުރުތަކުގެ އަގުތައް ކަނޑައަޅާފައެވެ.
ފ. އަތޮޅުގެ އެތެރޭގެ ދަތުރުތަކަށް ބަލާއިރު، އެއްކޮޅު ދަތުރުތަކުގެ އަގުތައް އުޅެނީ 35 ރުފިޔާ އާއި 70 ރުފިޔާއާ ދެމެދުގައެވެ. އަދި ދެކޮޅު ދަތުރެއްނަމަ އެންމެ އަގުހެޔޮކޮށް 65 ރުފިޔާއަށް ދަތުރުކުރެވޭއިރު، އެންމެ އަގުބޮޑު ދަތުރަކަށް ނަގާނީ 130 ރުފިޔާއެވެ.
ދ. އަތޮޅުގެ އެތެރޭގެ ދަތުރުތަކަށް ބަލާއިރު، އެންމެ އަގުހެޔޮކޮށް އެއްކޮޅު ދަތުރެއް ކުރަނީ 35 ރުފިޔާއަށެވެ. ނަމަވެސް ފ. އަތޮޅާ އަޅާބަލާއިރު ދ. އަތޮޅުގެ ބައެއް ރޫޓުތަކުގެ އަގުތައް ބޮޑެވެ. އެގޮތުން ދ. އަތޮޅުގެ އެތެރޭގެ ދަތުރަކަށް އެއްކޮޅަށް 125 ރުފިޔާ އަދި ދެކޮޅު ދަތުރަކަށް 225 ރުފިޔާ އާ ހަމައަށް އަގުތައް އުޅެއެވެ.
ފ. އަތޮޅާއި ދ. އަތޮޅު ގުޅުވައިދޭ ދަތުރުތަކުގެ އަގުތަކަށް ބަލާއިރު، އެއްކޮޅު ދަތުރެއްގެ އަގު އުޅެނީ 130 ރުފިޔާ އާއި 150 ރުފިޔާއާ ދެމެދުގައެވެ. އަދި މި ދެ އަތޮޅު ދެމެދު ކުރާ ދެކޮޅު ދަތުރެއްގެ އަގު އުޅެނީ 260 ރުފިޔާ އާއި 300 ރުފިޔާއާ ދެމެދުގައެވެ.
އާރުޓީއެލްގެ އާންމު އުސޫލުގެ ދަށުން، 65 އަހަރުން މަތީގެ އިސްރަށްވެހިންނާއި، 3 އަހަރުން ދަށުގެ ކުޑަކުދިންގެ އިތުރުން އެންސްޕާގައި ރަޖިސްޓްރީވެފައިވާ ނުކުޅެދުންތެރިކަން ހުންނަ ފަރާތްތަކަށް އައިޑީ ކާޑު ދެއްކުމުން މުޅިން ހިލޭ ދަތުރުކުރެވޭނެއެވެ.
