މާލޭ ނޯތު ހާބަރުގެ 'އޭ ޒޯން' އިން މީގެ ކުރިން ލިބެން ނެތް ކަރަންޓާއި ފެނުގެ ހިދުމަތް ފޯރުކޮށްދިނުމުގެ މަސައްކަތް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ފަށައިފި އެވެ.

އެމްޕީއެލް އިން ބުނި ގޮތުގައި، މާލޭގެ ބޮޑުތަކުރުފާނު މަގު ތަރައްގީކުރުމުގެ މަސައްކަތަށްޓަކައި މީގެ ކުރިން ނޯތު ހާބަރުން ހިދުމަތް ހޯދަމުންދިޔަ އުޅަނދުތައް ވަނީ އެމްއެމްއޭ ސަރަހައްދާއި ހުޅުމާލެ ޕެޓްރޯލް ޖެޓީއަށް ވަގުތީ ގޮތުން ބަދަލުކޮށްފަ އެވެ. ނަމަވެސް، މަސައްކަތްތައް ނިމުމާ ގުޅިގެން މުދަލާއި ޕަސެންޖަރުން އުފުލާ އުޅަނދުތައް މިހާރު އަލުން 'އޭ ޒޯން' އަށް ބަނދަރުކުރަން ފަށާފައިވާ ކަމަށް އެމްޕީއެލް އިން ބުންޏެވެ.

އެގޮތުން، މާލޭ ނޯތު ހާބަރުގެ ޓީމުން މިހާރު މަސައްކަތް ކުރަމުންދަނީ މީގެ ކުރިން 'އޭ ޒޯން' އިން ލިބެން ނެތް ކަރަންޓާއި ފެނުގެ ހިދުމަތް އެ ސަރަހައްދުން ފޯރުކޮށްދިނުމަށެވެ. އަދި ނޯތު ހާބަރުގެ ހިދުމަތް އަލުން ފެށިއިރު ގެނެވުނު އެންމެ ފާހަގަކޮށްލެވޭ ބަދަލަކީ، ބޭނުންނުކުރެވޭ ވަރަށް ހަލާކުވެފައި ހުރި ފައްތިޔާތަކުގެ ބަދަލުގައި 36 ފައްތިއްޔާ ބުޑު ފައްތައި، މުޅިން އާ ފައްތިއްޔާތައް ބޭނުންކުރަން ފެށުމެވެ. މި ބަދަލާއެކު، އެ ބަނދަރު ބޭނުންކުރާ އުޅަނދުފަހަރަށް ކުރިއަށްވުރެ ރައްކާތެރިކަމާއެކު ބަނދަރުކުރުމުގެ ފުރުސަތު ލިބިގެންދާނެ އެވެ.

ބޮޑުތަކުރުފާނު މަގުގެ މަޝްރޫއަކީ 144.50 މިލިއަން ރުފިޔާއަށް 455 ދުވަސްތެރޭ ނިންމުމަށް އެމްޓީސީސީއާ ހަވަލުލުކޮށްފައިވާ މަޝްރޫއެއް ނަމަވެސް މި މަޝްރޫއުވަނީ މިޔަށްވުރެ ކުރިން ނިންމާ ސަރުކާރާއި ހަވާލުކޮށްފަ އެވެ.