ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒް އަލް ސައުދުގެ ފަރާތްޕުޅުން ދެއްވާ ރޯދަވީއްލުމުގެ ޕްރޮގްރާމް ރާއްޖޭގައި ރަސްމީކޮށް އިފްތިތާހުކޮށްފި އެވެ.
މި ޕްރޮގްރާމް އިފްތިތާހުކޮށްދެއްވީ އިއްޔެ އިސްލާމީ މަރުކަޒުގައި ބޭއްވި ހާއްސަ ރަސްމިއްޔާތެއްގައި އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު އެވެ. މި ޕްރޮގުރާމު އިފްތިތާހް ކުރެއްވުމަށްޓަކައި ސައުދީ އަރަބިއްޔާއިން ދިވެހިރާއްޖެއަށް ކަނޑައަޅުއްވާފައިވާ ސަފީރު ހިޒް އެކްސެލަންސީ ޔަހަޔާ ހަސަން އަލްގަހްތާނީ ވަނީ ބައިވެރިވެވަޑައިގެންފަ އެވެ.
މި މަޝްރޫއު އިފްތިތާހް ކުރެއްވުމަށްޓަކައި ސައުދީ އަރަބިއްޔާގެ އިސްލާމިކް މިނިސްޓްރީގެ އިސް ވަފުދެއްވެސް ވަނީ ވަޑައިގަންނަވާފަ އެވެ.
މި ޕްރޮގްރާމްގެ ދަށުން ރޯދަމަހުގެ ކޮންމެ ދުވަހަކު 150 މީހުންނަށް ރޯދަވީއްލުން ފޯރުކޮށްދިނުމަށް ވަނީ ހަމަޖެހިފަ އެވެ. ރާއްޖޭގައި ހުންނަ ސައުދީ އަރަބިއްޔާގެ އެމްބަސީން އިންތިޒާމުކުރައްވާ މި ހަރަކާތަކީ ދެ ގައުމުގެ ދެމެދުގައި އޮތް ގާތް ގުޅުން ރަމްޒުކޮށްދޭ ކަމެއް ކަމުގައި ވަޒީރު ޝަހީމް ފާހަގަކުރެއްވި އެވެ. ރޯދަވީއްލުމުގެ ޕްރޮގްރާމެއް ރާއްޖޭގައި ފައްޓަވާފައިވާއިރު ކޮންމެ އަހަރަކުވެސް ރޯދަމަހާ ދިމާކޮށް ސައުދީ ސަރުކާރުން އަންނަނީ ރާއްޖެއަށް ކުރިއަށްގެންދާ ހަރަކާތެކެވެ.
