ގެވެށި އަނިޔާ ހުއްޓުވުމުގެ ގާނޫނުގެ ދަށުން، އަނިޔާ ލިބޭ ފަރާތްތަކުގެ ހިމާޔަތުގައި ކޯޓުން ނެރޭ ރައްކާތެރިކުރުމުގެ އަމުރުތަކާ ހިލާފުވާ މައްސަލަތައް އިތުރުވަމުންދާކަން ފުލުހުން ބުނެފި އެވެ.

ގެވެށި އަނިޔާ ހިމާޔަތް ކުރުމުގެ އަމުރަކީ އަނިޔާގެ ޝިކާރައަކަށްވާ މީހާ އަލުން އަނިޔާ ލިބިދާނެ ކަމުގެ ބިރު އޮތް ހާލަތެއްގައި އެ މީހަކު ހިމާޔަތް ކުރުމަށް ކޯޓަކުން ނެރެފައިވާ ގާނޫނީ އަމުރެކެވެ. މި އަމުރުގައި އަނިޔާ ކުރާ މީހާ ވަކި އަހްލާގީ މިންގަނޑުތަކުން ދުރުހެލިވުމަށް ޝަރުތުތައްކެއްވެސް ކަނޑައަޅާފައިވެ އެވެ. މި އަމުރުގެ މައިގަނޑު މަގްސަދަކީ އަނިޔާ ލިބޭ މީހާގެ ޖިސްމާނީ އަދި ނަފްސާނީ ދުޅަހެޔޮކަން ރައްކާތެރިކޮށް، އެމީހެއްގެ އަސާސީ ހައްގުތައް ރައްކާތެރިކުރުމެވެ.

ފުލުހުން ބުނި ގޮތުގައި 2025 ވަނަ އަހަރުގެ ތަފާސްހިސާބުތަކަށް ބަލާއިރު، ގެވެށި އަނިޔާއިން ރައްކާތެރިކުރުމުގެ އަމުރާ ހިލާފުވެގެން ޖުމްލަ 99 މައްސަލައެއް ރިޕޯޓުކޮށްފައިވެ އެވެ. މި މައްސަލަތަކާ ގުޅިގެން 38 މީހަކު ވަނީ  ފުލުހުންގެ ބެލުމުގެ ދަށަށް ގެންގޮސްފަ އެވެ.

ފުލުހުން އިތުރަށް ބުނީ، ކޯޓުން ނެރޭ "ރައްކާތެރިކުރުމުގެ ވަގުތީ އަމުރު" ނުވަތަ "ރައްކާތެރިކުރުމުގެ އަމުރު" އާ އެއްވެސް ފަރާތަކުން ހިލާފުވެއްޖެނަމަ، އެއީ ޖިނާއީ ކުށެއްގެ ގޮތުގައި ތަހުގީގު ކުރެވޭނެ ކަމެކެވެ. އަދި މިފަދަ މައްސަލަތައް ތަހުގީގު ކުރުމަށްފަހު، ދައުވާ އުފުލުމަށްޓަކައި ޕްރޮސިކިއުޓާ ޖެނެރަލްގެ އޮފީހަށް ފޮނުވޭނެ ކަމަށްވެސް ބުންޏެވެ. އެގޮތުން 2025 ވަނަ އަހަރުގެ ތެރޭގައިވެސް މިފަދަ 24 މައްސަލައެއްގައި ދައުވާކުރުމަށް ޕްރޮސިކިއުޓާ ޖެނެރަލްގެ އޮފީހަށް ހުށަހަޅާފަ ވާނެ ކަމަށް ފުލުހުން ބުންޏެވެ.

މީގެއިތުރުން ފުލުހުން ވަނީ، ކޯޓުތަކުން ނެރޭ ރައްކާތެރިކުރުމުގެ އަމުރުތަކަށް ފުރިހަމައަށް ބޯލަނބާ، އެ އަމުރުތަކަށް އިހުތިރާމްކުރުމަށް އިލްތިމާސްކޮށްފަ އެވެ. އަދި އަމުރާ ހިލާފު އެއްވެސް އަމަލެއް ހިނގާނަމަ، ލަސްނުކޮށް އެކަން ރިޕޯޓުކުރުމަށްވެސް ވަނީ ބާރުއަޅާފަ އެވެ. ފުލުހުން ބުނި ގޮތުގައި ގެވެށި އަނިޔާގެ ޝިކާރައަކަށްވާ ފަރާތްތަކަށް އަމާން ރައްކާތެރި މާހައުލެއް ކަށަވަރުކޮށްދިނުމަކީ ދިވެހި ފުލުހުންގެ ހިދުމަތުން ބޮޑު އިސްކަމެއްދޭ މަސައްކަތެކެވެ.