ޕޮލިސް ކޮމިޝަނަރުގެ މަގާމުގައި ހުންނެވި އިސްމާއިލް ނަވީން ފުލުހުންގެ ހިދުމަތުން ރިޓަޔާ ކުރެއްވުމުން، ފުލުހުންގެ ހިންގުން ވަގުތީ ގޮތުން ޑެޕިއުޓީ ކޮމިޝަނަރު ފަރުހާދު ފިކުރީއާ ހަވާލުކޮށްފި އެވެ.

ފުލުހުން ބުނި ގޮތުގައި، ނަވީން އިއްޔެއިން ފެށިގެން ފުލުހުންގެ ވަޒީފާއިން ޝަރަފުވެރިކަމާއެކު ރިޓަޔާ ކުރައްވާފައިވާތީ، ދިވެހި ފުލުހުންގެ ހިދުމަތުގެ ގާނޫނުގައިވާ ގޮތުގެމަތިން އިއްޔެ އިން ފެށިގެން ޕޮލިސް ކޮމިޝަނަރުގެ ޒިންމާތައް ނަންގަވާނީ ޑެޕިއުޓީ ކޮމިޝަނަރު އޮފް ޕޮލިސް ފަރުހާދު ފިކުރީ ކަމަށެވެ.

31 އަހަރުވަންދެން ފުލުހުންނަށް ހިދުމަތްކުރި ޕޮލިސް ކޮމިޝަނާގެ މަގާމަށް އިސްމާއީލް ނަވީން އައްޔަނު ކުރެއްވީ ޖޫން 10, 2025 ގަ އެވެ. އޭނާ އެ މަގާމަށް އައްޔަނު ކުރެއްވީ އެ މަގާމުގައި ކުރިން ހުންނެވި އަލީ ޝުޖާއު އޭޕްރީލް 25, 2025 ވަނަ ދުވަހު އިސްތިއުފާ ދެއްވުމުންނެވެ.