ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެވަޑައިގަންނަވާފައިވާ ވަޢުދުފުޅާ އެއްގޮތަށް، މިއަހަރުގެ ރަމަޟާން މަހުގެ ކަރަންޓު ބިލުތަކުން ޑިސްކައުންޓު ދިނުމަށްޓަކައި ބޭނުންވާ ރީޑިންގތައް ނަގައި، ވަކި ބިލެއް ތައްޔާރުކުރުމުގެ މަސައްކަތް ފަށައިފިއެވެ.

ސްޓެލްކޯއިން ސޯޝަލް މީޑިއާގައި ހިއްސާކުރި މަޢުލޫމާތެއްގައި ބުނެފައިވަނީ، ރަމަޟާން މަހުގެ ކަރަންޓު ބިލު 400 ރުފިޔާއަށްވުރެ ބޮޑު ނުވާނެހެން ޑިސްކައުންޓް ދިނުމަށް ރައީސުލްޖުމްހޫރިއްޔާ ނިންމަވާފައިވާތީ، އެ މަހަށް ވަކި ބިލެއް ތައްޔާރުކުރުމަށްޓަކައި ރީޑިންގ ނެގުމުގެ މަސައްކަތް މި މަހުގެ 16 އަދި 17 ވަނަ ދުވަހު ކުރިއަށް ގެންގޮސްފައިވާ ކަމަށެވެ.

މިދިޔަ އަހަރުވެސް ރަމަޟާން މަހާ ދިމާކޮށް ކަރަންޓު ބިލާއި ފެން ބިލުން ޑިސްކައުންޓް ދެއްވުމަށް ސަރުކާރުން ވަނީ ގާތްގަނޑަކަށް 130 މިލިޔަން ރުފިޔާ ހަރަދުކޮށްފައެވެ. މިއީ ރަމަޟާން މަހެއްގައި މިގޮތަށް ރާއްޖޭގެ ހުރިހާ ރައްޔިތުންނަށް އަމާޒުކޮށް ބިލުތަކުން ޑިސްކައުންޓު ދޭ ތިންވަނަ ފަހަރެވެ.

ރަމަޟާން މަހުގެ ހަރަދުތަކަށް ލުޔެއް ހޯދައިދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުން ގެންދަވާ މަސައްކަތްޕުޅުތަކުގެ ތެރެއިން، ކަރަންޓާއި ފެން ބިލުން ޑިސްކައުންޓް ދިނުމުގެ އިތުރުން، ކޮންމެ ގޭބީސީއަކަށް ސަރުކާރުގެ ފަރާތުން ވަނީ މަސްދަޅު ކޭހެއްވެސް ހަދިޔާކުރައްވާފައެވެ.

މި ފިޔަވަޅުތަކަކީ ރަމަޟާން މަހު ތަކެތީގެ އަގުބޮޑުވެ، އިޤްތިޞާދީ ގޮތުން ރައްޔިތުންނަށް ކުރިމަތިވާ ތާށިކަމަށް ހައްލެއް ހޯދައިދިނުމަށްޓަކައި ސަރުކާރުން އެޅުއްވި ވަރަށް މުހިންމު ފިޔަވަޅުތަކެއްގެ ގޮތުގައި ގިނަ ބަޔަކު ފާހަގަކުރެއެވެ.