ކުރިއަށް އޮތް ލޯކަލްް ކައުންސިލު އިންތިހާބުގައި ވެރިކަންކުރާ ޕީއެންސީއަށް 800 އާއި 900 އާ ދެމެދުގެ ގޮނޑި ކާމިޔާބުކުރާނެ ކަމަށް ބެލެވޭކަމަށް އެ ޕާޓީގެ ޕާލިމަންޓަރީ ގުރޫޕުގެ ލީޑަރު އަދި ކައުންސިލު އިންތިހާބުގެ ކެމްޕެއިން މެނޭޖަރު އިބްރާހީމް ފަލާހު ވިދާޅުވެއްޖެ އެވެ.
ފަލާހު މިފަދައިން ވިދާޅުވީ، ކައުންސިލު ގޮނޑިތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މާފަންނު ދާއިރާތަކުގެ ގޮނޑިތަކަށް ވާދަކުރައްވާ ކެންޑިޑޭޓުންގެ ކެމްޕޭން ފެށުމަށް ރޭ ބޭއްވި ރަސްމިއްޔާތުގަ އެވެ. އޭނާ ވިދާޅުވީ، އެ ޕާޓީއަށް އޮތް ތާއީދު ފެންނަ އެއްކަމަކީ އިންތިހާބަކާ ނުލައި އެ ޕާޓީއަށް 69 ގޮނޑި ކާމިޔާބުކުރެވިފައިވުން ކަމަށެވެ. އެގޮތުން، އިންތިހާބުގައި ވާދަކުރާ ކެންޑިޑޭޓުންގެ ނަން ތަރުތީބުކުރުން މިމަހުގެ 12 ވަނަ ދުވަހު އޮތްއިރު ކެންޑިޑޭޓުންގެ ނަން އަނބުރާ ގެންދިއުމުގެ ފުރުސަތު ނަން ތަރުތީބު ކުރުމާ ހަމައަށް އޮތީ ހުޅުވާލާފަ އެވެ. އެގޮތުން އިންތިހާބަކާ ނުލައި ޕީއެންސީން މިހާތަނަށް 69 ގޮނޑި ކާމިޔާބުކޮށްފައިވަ އެވެ.
މާލޭގައި މިދިޔަ ހޯމަ ދުވަހުގެ ރޭ ބޭއްވި ކެމްޕޭން ޖަލްސާއެއްގައި ވާހަކަދައްކަމުން ފަލާހު ވިދާޅުވީ ޕީއެންސީގެ ތަފާތު އެކި ހިސާބުތައް ދައްކާ ގޮތުގައި އެ ޕާޓީން ގާތްގަނޑަކަށް 800 ނުވަތަ 900 ގޮނޑި ކާމިޔާބުކުރާނެ ކަމަށެވެ. އަދި މި އިންތިހާބުގައި ގިނަ އަދަދަކަށް މިނިވަން ކެންޑިޑޭޓުން ވާދަކުރާއިރު، ޕީއެންސީން ތާއީދުކުރާ އެއްވެސް މިނިވަން ކެންޑިޑޭޓެއް ނުހުންނާނެ ކަމަށްވެސް ފަލާހު ވިދާޅުވި އެވެ.
"ޕީއެންސީގެ ކެންޑިޑޭޓުންނަކީ، ޕީއެންސީން ޓިކެޓު ދީގެން ކުރިމަތިލައްވާފައި ތިއްބެވި ކެންޑިޑޭޓުން. ޕީއެންސީގެ އެއްވެސް ކެންޑިޑޭޓެއް އަމިއްލަ ގޮތުން ކުރިމަތިލާފައި އަދި އެހެން ޕާޓީއަކުން ކުރިމަތިލާފައެއް ނުހުންނާނެ. އެގޮތަށް އެ އަޑު ފަތުރާ ހުރިހާ ވާހަކަތަކަކީ ހަގީގަތާ ހިލާފު ދޮގު ވާހަކަތައް،" ފަލާހު ވިދާޅުވި އެވެ.
މީގެއިތުރުން، ކޮންގްރެސް ޕާޓީއަށް އިންތިހާބަކާ ނުލައި ގިނަ ގޮނޑިތައް ލިބިފައިވުމާއެކު، ކެމްޕެއިނުގެ ކަންކަން ކުރިއަށްދާ ގޮތަށް ބައްލަވާއިރު މިހާރު މަސްެރަހު އޮތް ގޮތުން އެ އިންތިހާބުގައި ކޮންގްރެސް ޕާޓީއަށް 1،350 ވަރަކަށް ގޮނޑީގެ ތެރެއިން މަދުވެގެން 800 އާއި 900 އާ ދެމެދުގެ ގޮނޑި ކާމިޔާބުވާނެ ކަމުގައި ފަލާހު ވިދާޅުވި އެވެ.
