ކުރީގެ އިންޓަނޭޝަނަލް އެއާޕޯޓަށް، ޑޮމެސްޓިކް ޓާމިނަލް ބަދަލުކުރުމާ ގުޅިގެން އެއާޕޯޓްގެ ޓްރެފިކް ފްލޯއަށް މިރެއިން ފެށިގެން ބަދަލު އަންނާނެކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ބުނެފި އެވެ.
އެމްއޭސީއެލުން ނެރެފައިވާ ބަޔާނެއްގައި ބުނެފައިވަނީ، 17 ފެބްރުވަރީ 2026 އިން ފެށިގެން ގެންނަން ނިންމާފައިވާ މި ބަދަލުތަކާއެކު، ޑޮމެސްޓިކް ޓާމިނަލަށް ފަސިންޖަރުން ގޮވައިގެން އަންނަ އުޅަނދުތައް މަޑުކުރުމަށް ހަމަޖެހިފައިވަނީ ކުރީގެ އިންޓަނޭޝަނަލް ޓާމިނަލް ކުރިމައްޗަށް ކަމަށެވެ.
މި ބަދަލާއެކު ކުރީގެ ޑޮމެސްޓިކް ޓާމިނަލް ކައިރިއަށް އުޅަނދުތައް މަޑުކުރުމާއި ފަސިންޖަރުން ބޭލުމަކީ މަނާކަމެއް ކަމަށްވެސް އެމްއޭސީއެލުން ވަނީ ބުނެފަ އެވެ.
އެހެންވެ، އެއާޕޯޓުން ހިދުމަތް ހޯދާ ފަރާތްތަކާއި އުޅަނދު ދުއްވާ ފަރާތްތަކުންވެސް މި ބަދަލުތަކަށް ސަމާލުވުމަށް އެމްއޭސީއެލްއިން ވަނީ އެދިފަ އެވެ. ވީއައިއޭގެ އާ ޓާމިނަލްގެ މަސައްކަތް ނިންމާ މިދިޔަ އަހަރުގެ ޖުލައި މަހުގެ 26 ގައި ހުޅުވުމާއެކު، ކުރީގެ އިންޓަނޭޝަނަލް ޓާމިނަލްގެ ހުރިހާ ހިދުމަތެއް އާ ޓާމިނަލްއަށް ވަނީ ބަދަލުކޮށްފަ އެވެ.
