ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއްކޮށްލުމަށް ގާނޫނު އަސާސީއަށް އިސްލާހު ގެނައުމުގެ ބިލު ތަސްދީގުކުރެއްވުމުގެ ކުރިން، ލޯކަލް ކައުންސިލް އިންތިހާބާއި އެކު ރެފަރެންޑަމެއް ބާއްވަން ރައީސުލްޖުމްހޫރިއްޔާގެ ގަރާރަކުން ނިންމަވައިފި އެވެ. އެހެންކަމުން މި އިންތިހާބު އޮންނާނީ ކައުންސިލް އިންތިހާބު ބާއްވާ ދުވަސް ކަމަށްވާ އޭޕްރިލް 4 ގަ އެވެ.

މި ބިލުގައި ހިމެނޭ އިސްލާހުތަކަކީ ގާނޫނުއަސާސީގެ 262 ވަނަ މާއްދާގެ (ށ) އާއި ރައްޔިތުންގެ ހިޔާލު ހޯދުމުގެ އާންމު ވޯޓު ނެގުމުގެ ގާނޫނުގެ ދަށުން، ރައީސް ބިލު ތަސްދީގުކުރެއްވުމުގެ ކުރިން ރައްޔިތުންގެ ރުހުން އޮތްތޯ ބެލުން ލާޒިމުކުރާ ކަންކަމެވެ. އެގޮތުން، ގާނޫނުއަސާސީގައިވާ ގޮތުން، މިފަދަ އިސްލާހެއް ތަސްދީގުކުރެވޭނީ ވޯޓުގައި ބައިވެރިވި މީހުންގެ މެޖޯރިޓީ އެކަމަށް ލިބިއްޖެ ނަމަ އެވެ. އަދި ނުލިބިއްޖެނަމަ އެ ބިލެއް ބާތިލުވާނެ އެވެ.

މި ރިފަރެންޑަމްގައި، ރައްޔިތުންގެ ހިޔާލު ހޯދުމަށް އެދި ހުށަހަޅާނެ ސުވާލަކީ "ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބޭއްވުމަށާއި، ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށް ޓަކައި، ރައްޔިތުންގެ މަޖިލީހުން ފާސްކުރައްވައިފައިވާ "ޤާނޫނުއަސާސީއަށް 8 ވަނަ އިސްލާހު ގެނައުމުގެ ބިލު" ރައީސުލްޖުމްހޫރިއްޔާ ތަސްދީގުކުރެއްވުމަށް ފެނޭ ހެއްޔެވެ؟" މި އެވެ.

އެއާއެކު މި ވޯޓުގެ ރަސްމީ ނަތީޖާ އިއުލާންކުރާތާ 15 ދުވަހުގެ ތެރޭގައި، ރައްޔިތުންގެ މެޖޯރިޓީ ލިބިފައިވާނަމަ ރައީސް އެ ބިލު ތަސްދީގުކުރައްވައި ސަރުކާރުގެ ގެޒެޓުގައި ޝާއިއުކުރައްވަން ޖެހޭނެ އެވެ.