އިންތިހާބަކާއި ނުލައި ލޯކަލް ކައުންސިލްގެ 28 ގޮނޑި ސަރުކާރު ހިންގާ މައި ޕާޓީ ޕީއެންސީއަށް ލިބިފައިވާ ކަަމަށް އިލެކްޝަންސް ކޮމިޝަން (އީސީ)ން ހާމަކޮށްފި އެވެ.

އީސީ އިން ބުނި ގޮތުގައި، އިންތިހާބަށް ކުރިމަތިލުމަށް މުއްދަތު ހަމަވިއިރު އިންތިހާބު ކުރަންޖެހޭ އަދަދަށް ކުރިމަތިލާފައިވާ ދާއިރާތަކާއި، ޝަރުތު ހަމަވާ ކެންޑިޑޭޓުންގެ ނަންތައް ތަރުތީބުކޮށް، ގުރުއަތުލުން އޮންނަ ތަނުގައި ނަންތައް އިއުލާނުކުރުމުގެ ކުރިން ނަންއަނބުރާ ގެންދިޔުމާ ގުޅިގެން، އިންތިހާބު ވި ފަރާތްތަކުގެ މައުލޫމާތު އާއްމުކޮށްފަ އެވެ.

އެގޮތުން ކައުންސިލުގެ 28 ގޮނޑިއެއް ވަނީ ވެރިކަން ކުރާ ޕީއެންސީއަށް ލިބިފަ އެވެ. މިހެން މިވީ، ކުރިން ކުރިމަތި ލާފައިވާ ކެންޑިޑޭޓުންގެ ނަންތަށް އިއުލާނުކުރުމުގެ ކުރިން ނަންތަށް އަންބުރާ ގެންދިޔުމުން ޕީއެންސީގައި ތިބި ކެންޑިޑޭޓުންނާ ވާދަކުރާނެ އިތުރު ކެންޑިޑޭޓުން ނެތުމުންނެވެ.

ޕީއެންސީގެ އިތުރުން އެމްޑީޕީ، އަދާލަތު ޕާޓީ އަދި އަމިއްލަގޮތުން ވާދަކުރާ ފަރާތްތަކެއްވެސް ވަނީ މިގޮތަށް ގޮނޑި ކަށަވަރުވެފަ އެވެ. އެގޮތުން އެމްޑީޕީއަށާއި އަދާލަތު ޕާޓީއަށް 1 ގޮނޑި ކަށަވަރު ވެފައިވާއިރު، އަމިއްލަ ގޮތުން ވާދަކުރާ 3 ފަރާތަކަށް ވަނީ ގޮނޑި ކަށަވަރުވެފަ އެވެ.

މީގެއިތުރުން ޕީއެންސީއަށް ވަނީ އިންތިހާބަކާ ނުލާ އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ ވެސް 41 ގޮނޑި ކަށަވަރުކޮށްފަ އެވެ. އެގޮތުން ޕީއެންސީއަށް20  ގޮނޑި ލިބިފައިވާއިރު، އެމްޑީޕީއަށް ވަނީ 5 ގޮނޑި ލިބިފަ އެވެ. އަދި އަމިއްލަގޮތުން ކުރިމަތިލި ފަރާތްތަކަށް 2 ގޮނޑި ލިބިފައިވާއިރު އަދާލަތު ޕާޓީއަށް ވަނީ 1 ގޮނޑި ލިބިފަ އެވެ.

މި އިންތިހާބުގައި ވޯޓުލުމުގެ ހައްގު ލިބިފައިވަނީ ޖުމްލަ 249،937 މީހަކަށެވެ. އެއީ 144،527 އަންހެނުންނާއި، 150،410 ފިރިހެނުންނެވެ. ވޯޓުލުމުގެ ހައްގު ލިބިފައިވާ މީހުންގެ ލިސްޓަށް ޝަކުވާ ހުށަހެޅުމުގެ ފުރުސަތުވެސް މިހާރު ވަނީ ހުޅުވާލާފަ އެވެ. އެގޮތުން، ޝަކުވާ ހުށަހަޅަން ބޭނުންވާ ފަރާތްތަކުން މި މަހުގެ 18 ވަނަ ދުވަހުގެ މެންދުރުފަހު 3:00 ގެ ކުރިން މައިޕޯޓަލް (my.elections.gov.mv) މެދުވެރިކޮށް ޝަކުވާ ހުށަހެޅޭނެ އެވެ. އަދި ސިޔާސީ ޕާޓީތަކުން ޝަކުވާ ހުށަހަޅަންޖެހޭނީ އެ ފަރާތްތަކަށް ހާއްސަކުރެވިފައިވާ "ސިމެދަ ޕޯޓަލް" މެދުވެރިކޮށް ކަމަށްވެސް އީސީން ބުނެފައިވެ އެވެ.