ކުރިޔަށް އޮތް ލޯކަލް ކައުންސިލް އިންތިހާބުގައި އިދިކޮޅަށް ވޯޓު ދީގެން ކުރެވޭނެ އެއްވެސް ކަމެއް ނެތްކަމަށާއި އެއީ ބޭނުމެއް އޮތް ކަމެއް ނޫން ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ރޭ ވިދާޅުވެއްޖެ އެވެ.
މާމިގިލީ ދާއިރާގެ މެމްބަރުކަން ވެސް ކުރައްވާ ގާސިމް މިފަދައިން ވިދާޅުވީ، އެ ޕާޓީގެ ކެންޑިޑޭޓުން ތައާރަފުކޮށް ކައުންސިލް އިންތިހާބުގެ ކެމްޕެއިން ފެށުމަށް ޖުމްހޫރީ ޕާޓީގެ މައި މާލަން, މ. ކުނޫޒުގައި ބޭއްވި ޖަލްސާގައި ވާހަކަ ދައްކަވަމުންނެވެ. ގާސިމް ވިދާޅުވީ، ކައުންސިލް އިންތިހާބުގައި ޕީއެންސީއަށް ތާއީދުކުރަން ނިންމީ ގައުމުގެ ހަމަޖެހުން ގެއްލި ލޮޅުމެއް އަރާފަދަ ކަމެއް ކުރަން ބޭނުން ނުވާތީ ކަމަށެވެ. އެގޮތުން، ގައުމުގެ ދަރަނިތައް ދެއްކޭނެ މަގުތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ފަހިކޮށްދެވޭނީ ރައްޔިތުންގެ އެއްބާރުލުން އޮތްކަން ފުރިހަމައަށް އެމަނިކުފާނަށް ދައްކުވައިދީގެން ކަމަށްވެސް ގާސިމް ވިދާޅުވި އެވެ.
ގާސިމް އިތުރަށް ގޮވައިލައްވާފައި ވަނީ، ގައުމުގެ މަސްލަހަތާއި އަމާންކަމަށް ޓަކައި ޕީއެންސީއަށް ވޯޓު ދިނުމަށެވެ. އަދި އިދިކޮޅަށް ވޯޓު ދީގެން ކުރެވޭނެ އެއްވެސް ކަމެއް ނެތް ކަމަށާއި، ބޭނުން ނެތް ކަމެއް ކުރަނީ ކީއްކުރަންތޯ އޭނާ ވަނީ ސުވާލު އުފައްދާފަ އެވެ.
"ކީއްކުރަންތޯ ބޭނުން ނެތް ކަމެއް ކުރަނީ؟ އެއަށްވުރެ މާރަނގަޅުވާނެ މަރުވެފައި އޮތް މަންމަގެ މާހަނަ މައްޗަށް ގޮސް މަޑިއަކަށް ޖެހުނިއްޔާ، އެހެންވީމަ ހުރިހާ ބޭފުޅުން ވެސް ވޯޓު ދެއްވާ ޕީއެންސީގެ މެންބަރުންނަށް، ގައުމުގެ މަސްލަހަތާއި އަމާންކަން ކުރިއަށް ގެންދިޔުމަށްޓަކައި" ގާސިމް ވިދާޅުވި އެވެ.
މީގެއިތުރުން، ކައުންސިލްތަކުގެ މަސައްކަތްތައް ބިނާވެފައި އޮންނަނީ ދައުލަތުގެ ބަޖެޓުގެ މައްޗަށް ކަން ފާހަގަކުރައްވަމުން ގާސިމް ވިދާޅުވީ، ސަރުކާރުން ބަޖެޓު ދީގެން ނޫނީ ކައުންސިލްތަކަށް އެއްވެސް ކަމެއް ނުކުރެވޭނެ ކަމަށެވެ. އެހެންކަމުން ރަށަށް ރަނގަޅު ގޮތްތަކެއް އެދޭނަމަ ކުރަންޖެހޭ ކަމަކީ ސަރުކާރާ ގުޅިގެން މަސައްކަތް ކުރާނެ ޕީއެންސީގެ ކެންޑިޑޭޓުން އިންތިހާބު ކުރުން ކަމަށް އޭނާ ތަކުރާރުކޮށް ވިދާޅުވި އެވެ.
