ރޯދަ މަހަށް ހާއްސަކޮށް މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ކާގޯ ޑިސްޕޯސަލްގެ ހިދުމަތް ފަށައިފި އެވެ.
އެމްޕީއެލްއިން ބުނި ގޮތުގައި މި ހިދުމަތް ބޭނުންވާ ނަމަ އެމްޕީއެލްއަށް ސީސީ ކޮށް ކަސްޓަމްސް އަށް ސިޓީއެއް މެއިލްކުރަންޖެހޭނެ އެވެ. އަދި މިފަދައިން މެއިލް ކުރުމުން، ބޭނުންވާ ދުވަހާ ގަޑިއަކަށް އެތަކެތި ޑިސްޕޯސް ކޮށްލެވޭނެކަމަށް އެމްޕީއެލްއިން ބުންޏެވެ.
މުދާ ޑިސްޕޯސް ކުރެވޭނީ ކަސްޓަމްސް، އެފްޑީއޭ، ކްލިއަރެންސް އަދި ޑިސްޕޯސަލް އޮފިސަރުގެ ހާޒިރުގައި ގާނޫނީ އިޖުރާތައް ފުރިހަމަކޮށް އެވެ. އަދި ޑިސްޕޯސް ކުރަން ބޭނުންވާ ފަރާތްތަކުގެ ހާޒިރުގައި ވެސް މި އިޖުރާތް ހިންގާނެ އެވެ.
މީގެކުރިން ކާގޯ ޑިސްޕޯސްކުރަން ޖެހެނީ ބޯޓު ކުއްޔަށް ނަގައިގެން ތިލަފުއްޓަށް ދާށެވެ، ނަމަވެސް، އެމްޕީއެލްގެ ދަށަށް މި ހިދުމަތް ބަދަލުކުރުމުން ހަރަދު ކުޑަވެ އަދި ވަގުތުވެސް ސަލާމަތްވާނެ ކަމަށް އެމްޕީއެލްއިން ބުންޏެވެ.
