ތުއްތު ކުދިން ބަލަހައްޓާ މަންމައިންނަށް ލުއިވާނެ ހެން ވަޒީފާއާ ބެހޭ ގާނޫނަށް އިސްލާހު ހުށަހަޅައިފި އެވެ.
މިހާރު ވަޒީފާއާބެހޭ ގާނޫނު އޮންނަ ގޮތުން ދަރިންނަށް 1 އަހަރު ފުރެންދެން މުސާރައިން ނުކެނޑޭ ގޮތަށް ކޮންމެ ދުވަހަކު ދެ ފަހަރަށް 30 މިނެޓްގެ ހުސް ވަގުތުކޮޅެއް މުވައްޒަފުންނަށް ދޭން ޖެހެ އެވެ. ސަރުކާރުގެ ފަރާތުން މަޑަވެލި ދާއިރާގެ މެމްބަރު މުހައްމަދު ޝަމީޒް މިއަދު މަޖިލީހަށް ހުށަހެޅުއްވި އިސްލާހުގައި ވަނީ މިވަގުތު އިތުރުކޮށްފަ އެވެ.
އެގޮތުން މެމްބަރު ޝަމީޒް ހުށަހެޅުއްވީ ދަރިންގެ އުމުރުން 2 އަހަރު ވަންދެން މިހާރު ވެސް ލިބޭ 30 މިނެޓުގެ ދެ ބްރޭކް ލިބޭނެ ހެން ގާނޫނު އިސްލާހުކުރުމަށެވެ. ގާނޫނަށް ގެނައި އިސްލާހެއްގެ ދަށުން މިހާރު ވެސް ވިހައިގެން މައިންނަށް 6 މަހުގެ މެޓާނިޓީ ލީވް ލިބެ އެވެ.
މީގެ އިތުރަށް މި އިސްލާހުގައި ވަނީ ވަޒީފާއިން ވަކިކުރުމުގެ ކުރިން ދޭ ނޯޓިސްގެ މުއްދަތަށް ބަދަލު ގެނައުމަށް ވެސް ހުށަހަޅާފަ އެވެ. މި އިސްލާހުގައި ވަނީ އެއް އަހަރުނުވާ ކޮންމެ މުވައްޒަފަކަށް ވެސް މަދުވެގެން ދެ ހަފުތާގެ ނޯޓިހެއް ދޭން ވަނީ ހިމަނާފަ އެވެ. މީގެ ކުރިން އޮންނަ ގޮތުން 6 މަސް ނުވާ މުވައްޒަފުންނަށް 2 ހަފްތާގެ ނޯޓިހެއް ދޭކަށް ނުޖެހެ އެވެ. މި ނޯޓިސް ދިނުމުގައި ދެ ފަރާތުން ވަކި ގޮތަކަށް އެއްބަސްވާ ނަމަ، އެގޮތަށް އެއްބަސްވުން ހެދުމުގައި ހުރަހެއް ނެތެވެ.
