ބަޖެޓް ޑެފިސިޓް ކުޑަކުރުމަށް ގެނެވުނު ކުރިއެރުންތަކުގެ ސަބަބުން ރާއްޖެއަށް އިންވެސްޓަރުން އިތުބާރުކުރާ މިންވަރު އިތުރުވެފައިވާކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ، ޖަރުމަނުވިލާތަށް ކުރައްވަމުންގެންދަވާ ރަސްމީ ދަތުރުފުޅުގައި މިއަދު ބާލިންގައި ކުރިއަށްގެންދިޔަ މޯލްޑިވްސް – ޖާމަނީ ބިޒްނަސް ރައުންޑްޓޭބަލްގައި ބައިވެރިވެވަޑައިގެން ވާހަކަދައްކަވަމުންނެވެ. އެމަނިކުފާނު ވިދާޅުވީ، ދުނިޔޭގެ ވިޔަފާރީގެ މާހައުލަށް ބަދަލުތަކެއް ގެނެސް، ދެމެހެއްޓެނިވި ކުރިއެރުންތަކެއް ހޯދައިދިނުމުގައި މުހިންމު ދައުރެއް އަދާކުރާ ޖަރުމަނުގެ ވިޔަފާރިވެރިންނާ ބައްދަލުވުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށެވެ.
ރާއްޖޭގެ 'ވިޝަން 2040′ އާ ގުޅޭގޮތުން ވާހަކަފުޅު ދައްކަވަމުން، ރައީސް ވިދާޅުވީ އެއީ ދިވެހި އިގްތިސާދު ވަރުގަދަކޮށް، ދައުލަތުގެ މުއައްސަސާތައް ޒަމާނީކުރުމަށާއި، ތިމާވެށި ހިމާޔަތްކުރުމަށާއި ރައްޔިތުންގެ ދިރިއުޅުމުގެ ފެންވަރު މަތިކުރުމަށް ސަރުކާރުން ވެފައިވާ މުހިންމު ކަމެއް ކަމަށެވެ.
މީގެއިތުރުން ރައީސް ވަނީ، ރާއްޖޭގެ ރަސްމީ ރިޒާވް ތާރީހީ މިންވަރަކަށް އިތުރުވެފައިވާކަން ފާހަގަކުރައްވާ، މީގެ ސަބަބުން ބޭރު ފައިސާގެ ދައުރުވުން ރަނގަޅުވެފައިވާކަން ރައީސް ފާހަގަކުރައްވާފަ އެވެ. އަދި ދައުލަތުގެ މާލީ އަހުލާގު ހިފެހެއްޓުމަކީ ސަރުކާރުގެ މައިގަނޑު ސިޔާސަތެއްކަން ބަޔާންކުރައްވައި، ބަޖެޓު ޑެފިސިޓް ކުޑަކުރުމަށް ހޯދިފައިވާ ކުރިއެރުންތަކަށްވެސް ރައީސް އަލިއަޅުވާލެއްވި އެވެ. އެގޮތުން 'ގޫގުލް' ފަދަ ދުނިޔޭގެ ނަން މަޝްހޫރު ޓެކްނޮލޮޖީ ކުންފުނިތަކުން ރާއްޖޭގެ ޑިޖިޓަލް ގުޅުންތައް ވަރުގަދަކުރުމަށް އިންވެސްޓް ކުރަމުންދާކަން ވެސް ރައީސް ފާހަގަކުރެއްވި އެވެ.
