ކޯޓުތަކުގައި އެކި ސަބަބުތަކާ ހުރެ އެއް އަހަރަށް ވުރެ ދިގުލައިގެން ގޮސްފައިވާ ބެކްލޮގް ފިލުވަން ހާއްސަ ޓާސްކްފޯހެއް އެކުލަވާލައިފި އެވެ.
މި ޓާސްކްފޯސް އެކުލަވާލެވިފައި ވަނީ ކޯޓުގައި 13،000 އަށް ވުރެ ގިނަ މައްސަލަ އޮތުމުންނެވެ. ގަޟާއީ އަހަރު އިފުތިތާހުކުރުމަށް ބޭއްވި ރަސްމިއްޔާތުގައި އުއްތަމަ ފަނޑިޔާރު އަބްދުލްގަނީ ވިދާޅުވީ، ކޯޓުތައް ހަރުދަނާކަމާ އެކު ހިނގާ ކަމަށް ގަބޫލު ކުރެވޭނީ ލަސްވުމެއްނެތި އިންސާފު ގާއިމްވެގެންދާ ތަން ފެނިގެން ކަމަށާއި، އިންސާފު ލަސްވުމަކީ އިންސާފު ނުލިބުންކަން އެންމެން ވެސް ގަބޫލު ކުރާ ކަމަށެވެ.
އެހެންކަމުން، ކޯޓުތަކުގެ ބެކްލޮގް ފިލުވުމަށް ހާއްސަ ކަމެއްދީގެން ކުރިޔަށް ގެންދިޔުމަށް ޓާސްކްފޯހެއް އެކުލަވާލައި އެ ޓާސްކް ފޯސްގެ މަސައްކަތް މިއަދު ފަށައިފި އެވެ. މި ޓާސްކް ފޯސް އެކުލެވިގެންވަނީ އެކި މަރުހަލާތަކުގެ ކޯޓުތަކުން ތަމްސީލްވާގޮތަށް 9 މެންބަރުންގެ މައްޗަށެވެ. އަދި މި ޓާސްކް ފޯހުގެ މަގްސަދަކީ ނުނިމިހުރި މައްސަލަ ކުރިއަށް ގެންދިއުމަށް ދިމާވެފައިވާ ގޮންޖެހުންތަކަށް އިދާރީ ގޮތުން ހައްލު ހޯދައިދީ މައްސަލަ އަވަހަށް ނިންމުމަށް މަގު ފަހިކޮށްދިނުމެވެ.
