މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވައިގެ ދަތުރުފަތުރުގެ ސިނާއަތަށް ހާއްސަކޮށްގެން، ރާއްޖޭގައި ފުރަތަމަ ފަހަރަށް "ވެލާނާ އެވޯޑްސް" ތައާރަފުކޮށްފި އެވެ.

މިއީ ވައިގެ ދަތުރުފަތުރުގެ ގުޅުންތައް ބަދަހިކުރުމަށާއި، ހިދުމަތްތަކުގެ ފެންވަރު މަތިކުރުމުގެ އިތުރުން، ދަތުރުވެރިންނާއި ވިޔަފާރިވެރިންގެ މެދުގައި ރާއްޖެއަކީ މަގުބޫލު މަންޒިލެއްގެ ގޮތުގައި ދެމެހެއްޓުމަށް ވެލާނާ އިންޓަނޭޝަނަލް އެއަރޕޯޓް (ވީއައިއޭ) ގެ ބައިވެރިން ކުރަމުންދާ އަގުހުރި މަސައްކަތްތަކުގެ އަގުވަޒަންކުރުމުގެ ގޮތުން، ކޮންމެ އަހަރަކު ދިނުމަށް ހަމަޖެހިފައިވާ އެވޯޑެކެވެ.

މި އަހަރުގެ އެވޯޑް ރަސްމިއްޔާތުގައި ތިން ދާއިރާއަކުން ޖުމްލަ 22 އެވޯޑް ދިނުމަށް ވަނީ ނިންމާފަ އެވެ. އޭގެ ތެރޭގައި ހިމެނޭ މައިގަނޑު ކެޓަގަރީތަކަކީ ފަސިންޖާ އެވޯޑްސް، ކާގޯ އެވޯޑްސް އަދި ލައުންޖް އެވޯޑްސް އެވެ. މީގެ އިތުރުން، "އެއަރލައިން އޮފް ދަ އިޔާ" ހޮވައި، ހާއްސަ އެވޯޑެއް ދިނުމަށް ވެސް ވަނީ ހަމަޖެހިފަ އެވެ.

މި އަހަރުގެ އެވޯޑް ދިނުމުގެ ރަސްމިއްޔާތު ބޭއްވުމަށް ތާވަލުކޮށްފައިވަނީ މި މަހުގެ 12 ވަނަ ދުވަހުގެ ރޭ ކްރޮސްރޯޑްސް މޯލްޑިވްސްގައެވެ.