ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ފަހަތްޕުޅުގައި ރައްޔިތުން ސާބިތުކަމާއެކު ތިބެގެން އައްޑޫ ސިޓީއަށް ބޮޑެތި ކުރިއެރުންތަކެއް ލިބިގެންދާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
މިނިސްޓަރު މިފަދައިން ވިދާޅުވެފައިވަނީ، ޕީއެންސީގެ އައްޑޫ ސިޓީ ކެމްޕޭން ރަސްމީކޮށް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ. މިނިސްޓަރު ވިދާޅުވީ، ސަރުކާރާ ގުޅިގެން މަސައްކަތް ކުރުމުން އައްޑޫގެ ތަރައްގީ ވަރަށް އަވަހަށް ފެނިގެންދާނެ ކަމަށެވެ. އެގޮތުން، މިހާރުވެސް މި ސަރުކާރުން އައްޑޫގެ ކުރިއެރުމަށް ގިނަ މަސައްކަތްތަކެއް ފަށާފައިވާކަން އޭނާ ފާހަގަކުރެއްވި އެވެ.
މީގެއިތުރުން، މިނިސްޓަރު ވަނީ ރައީސް ޑރ. މުއިއްޒު ވެރިކަމާ ހަވާލުވެވަޑައިގަތްއިރު ގައުމުގެ އިގްތިސާދީ ހާލަތު އޮތީ ވަރަށް ދެރަކޮށް ކަމަށާއި، ގައުމުގެ މާލީ ހާލަތު އޮތީ ބޮޑުތަނުން ދަރަނިވެރިވެ، ނިޒާމުތައް ބަލިކަށިވެފައި ކަމަށް ވިދާޅުވެފަ އެވެ. ނަމަވެސް ރައީސް ވެރިކަމަށްއައިސް މިހާރު ރާއްޖޭގެ އިގްތިސާދު ހަމަޖައްސާފައިވާ ކަމަށް އޭނާ ވިދާޅުވި އެވެ. އަދި ރައީސްގެ ފަހަތްޕުޅުގައި ތިބެންވީ ސަބަބަކީ އެމަނިކުފާނު މުޅި ރާއްޖެއަށާއި ހާއްސަކޮށް އައްޑޫއަށް ވީ ވައުދުތައް ޗާޕްކޮށް، ކައުންސިލްތަކަށް ދީ ރައްޔިތުންގެ އަތްޕުޅަށްވި އަަރުވާފައިވާތީ ކަމަށް އޭނާ ވިދާޅުވި އެވެ.
"އިރާދަކުރެއްވިއްޔާ ދަރަނިވެރިވެސް ނުވެ ކުރިއަށް މި ދަނީ، ދާއިރުގައި، ރައީސް ޑރ. މުއިއްޒުގެ ފަހަތްޕުޅުގައި ތިބެންވީ ސަބަބަކީ އެމަނިކުފާނު މުޅި ރާއްޖެއަށް ހާއްސަކޮށް އައްޑޫއަށް ވީ ވައުދުތައް އެ އޮތީ ޗާޕްކޮށް، ކައުންސިލްތަކަށް ދީފައި، ރައްޔިތުންގެ އަތްޕުޅަށް އަަރުވާފައި، މި އޮތީއޭ މެނުއަލް،". ސައީދު ވިދާޅުވި އެވެ.
ވަޒީރު އިތުރަށް ވިދާޅުވީ، ރައްޔިތުންގެ މަޖިލީހުގެ ސުޕަ މެޖޯރިޓީ ސަރުކާރަށް ލިބުމަކީ ގައުމު ބާރުވެރިކޮށް، ސިޔާސީ ނުފޫޒުން އެއްކިބާވެ، އިހުލާސްތެރިކަމާއެކު މަސައްކަތް ކުރުމަށް ލިބޭނެ ފުރުސަތެއް ކަމަށެވެ. އަދި ޕީއެންސީގެ ކެންޑިޑޭޓުން އިންތިހާބު ކުރުމަކީ ރައީސްގެ ތަރައްގީގެ މެނިފެސްޓޯ ފުރިހަމައަށް ތަންފީޒު ކުރުމަށް މަގުފަހިވާނެ ކަމެއް ކަމަށްވެސް އޭނާ ވިދާޅުވި އެވެ.
