ހިތަދޫ ޕޯޓްގައި ބޮންޑެޑް ޒޯނެއް ގާއިމުކުރުމަށްޓަކައި މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑާ ދެމެދު މުހިންމު އެއްބަސްވުމެއްގައި ސޮއިކޮށްފި އެވެ.
މި މަޝްރޫއުގެ މައިގަނޑު މަގުސަދަކީ ހިތަދޫ ބަނދަރުގައި ކާބޯތަކެއްޗާއި އަސާސީ މުދާ ޑިއުޓީ ފްރީކޮށް ބެހެއްޓޭނެ އިންތިޒާމު ހަމަޖައްސައި، ބޮންޑެޑް ވެއާހައުސްގެ ހިދުމަތް ތައާރަފުކުރުމެވެ. އައްޑޫ ހައި ސްކޫލްގައި އިއްޔެ ބޭއްވި ހާއްސަ ރަސްމިއްޔާތެއްގައި، ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ އިކޮނޮމިކް މިނިސްޓަރު މުހައްމަދު ސައީދެވެ. އެމްޕީއެލްގެ ފަރާތުން ސޮއިކުރެއްވީ އެ ކުންފުނީގެ ސީ.އީ.އޯ މުހައްމަދު ވަޖީހް އިބްރާހީމެވެ.
މި އެއްބަސްވުމުގެ ދަށުން ހިތަދޫ ވިޔަފާރި ބަނދަރުގައި ކާބޯތަކެއްޗާއި އަސާސީ މުދާ އަދި އެހެނިހެން ބާވަތްތަކުގެ މުދާ ޑިއުޓީ ފްރީކޮށް ބެހެއްޓޭނެ ބޮންޑެޑް ސަރަހައްދެއް ގާއިމްކުރާނެ އެވެ. އަދި ރާއްޖޭގެ ދެކުނުގެ ސަރަހައްދުގައި ހިމެނޭ ރިޒޯޓްތަކަށް އަމާޒުކޮށްގެން ބޮންޑެޑް ވެއާހައުސްގެ ހިދުމަތުގެ އިތުރުން، އިމާރާތްކުރުމަށް ބޭނުންވާ ހިލަ އަދި ހިލަވެލި ފަދަ ބާވަތްތައް ގެނެސް ބަލްކްކޮށް ރައްކާކުރުމަށް ހާއްސަ ކުރެވިފައިވާ ސަރަހައްދެއް ގާއިމްކުރާނެ އެވެ.
މި އަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު ވަނީ، އައްޑޫ ސިޓީގައި ކާބޯތަކެއްޗާއި އަސާސީ މުދާ ޑިއުޓީ ނުދައްކައި ބެހެއްޓޭނެ ހިދުމަތް މި ފެބްރުވަރީ މަހުގެ ތެރޭގައި ހިތަދޫ ބަނދަރުގައި ފަށްޓަވާނެ ކަމަށް އިއުލާނުކުރައްވާފަ އެވެ. އެމްޕީއެލް އިން މައުލޫމާތު ދޭ ގޮތުގައި، މި އެއްބަސްވުމުގެ ދަށުން ހިތަދޫ ޕޯޓުގައި ބޮންޑެޑް ސަރަހައްދެއް ގާއިމުކުރުމުގެ އިތުރުން، ރާއްޖޭގެ ދެކުނުގެ ރިޒޯޓުތަކަށް އަމާޒުކޮށްގެން ބޮންޑެޑް ވެއާހައުސްގެ ހިދުމަތް ދިނުމަށް ވަނީ ރޭވިފަ އެވެ. މީގެއިތުރުން، އިމާރާތްކުރުމަށް ބޭނުންވާ ހިލަޔާއި ހިލަވެލި ފަދަ ތަކެތި ބަލްކްކޮށް އެތެރެކޮށް، ރައްކާކުރެވޭނެ ހާއްސަ ސަރަހައްދެއް ކަނޑައެޅުންވެސް މި މަޝްރޫއުގެ ތެރޭގައި ހިމެނެ އެވެ.
