ހއ. ދިއްދޫގެ އެއާޕޯޓާއި ބޯހިޔާވަހިކަމަށް ބޭނުންވާ ބިން ހިއްކުމުގެ މަޝްރޫއުގެ އަމަލީ މަސައްކަތުގެ 70% ނިމިފައިވާ ކަމަށް، މޯލްޑިވްސް އެއާޕޯޓް ކޮމްޕެނީ ލިމިޓެޑް (އެމްއޭސީއެލް) އިން ބުނެފި އެވެ.

އެމްއޭސީއެލްއިން ބުނިގޮތުގައި، މި މަޝްރޫއުގެ ދަށުން ހިއްކަން ޖެހޭ 111 ހެކްޓަރުގެ ތެރެއިން މިހާރު ވަނީ 78 ހެކްޓަރު ހިއްކާފަ އެވެ. އަދި މި މަޝްރޫއުގެ 70% މިހާރު ވަނީ ނިމިފަ އެވެ.

މި މަސައްކަތް ކުރިޔަށް ގެންދަނީ، ދުނިޔޭގައި މިވަގުތު އޮތް އެންމެ ބޮޑު އެއް ޓްރެއިލިން ސަކްޝަން ހޮޕާ ޑްރެޖަރު "ލީވް އެރިކްސަން" ބޭނުންކޮށްގެނެވެ.

އެގޮތުން "ލީވް އެރިކްސަން" ޑްރެޖަރަކީ އެއްފަހަރާ 46,000 ކޮޑި މީޓަރުގެ ވެލި ބޭރުކުރުމުގެ ގާބިލުކަން ހުރި، ދުނިޔޭގައި މިވަގުތު އޮތް އެންމެ ޒަމާނީ އަދި އެންމެ ބާރުގަދަ ދެ ޑްރެޖަރުގެ ތެރެއިން އެއް ޑްރެޖަރެވެ އެމްއޭސީއެލް އިން ބުނި ގޮތުގައި މި ޑްރެޖަރުގެ ސަބަބުން ބިން ހިއްކުމުގެ މަސައްކަތް ވަރަށް ހަލުވި މިނެއްގައި ކުރިއަށްދާނެ އެވެ.