ވިހަ ބާވަތެއް ހިމެނިފައިވާކަން ފާހަގަވެ ތުއްތު ކުދިންގެ ކިރުގެ ބާވަތެއް މަނާ ކޮށްފި އެވެ.
އެމްއެފްޑީއޭ އިން ނެރުނު ނޫސްބަޔާނެއްގައި ބުނިގޮތުގައި މަނާ ކޮށްފައި ވަނީ ފްރާންސްގެ "ބޭބީ ބަޔޯ" ނަމަކަށް ކިޔާ ކިރެކެވެ. އެމްއެފްޑީއޭއިން ބުނީ "ބޭބީ ބަޔޯ" މަރުކާގެ ތުއްތު ކުދިންގެ ކިރުގެ ބައެއް ބެޗްތަކުގައި 'ސެރެއުލައިޑް' ނަމަކަށް ކިޔާ ނުރައްކާތެރި ވިހަ މާއްދާއެއް ހުރިކަން ފާހަގަކުރެވިފައިވާ ކަމަށެވެ.
އެމްއެފްޑީއޭ އިން ނެރުނު ނޫސްބަޔާނެއްގައި ހާމަކޮށްފައިވާ ގޮތުގައި، މިކަމުގެ މަޢުލޫމާތު ލިބިފައިވަނީ ޔޫރަޕުގެ ރެޕިޑް އެލާޓް ސިސްޓަމް ފޯ ފުޑް އެންޑް ފީޑް (RASFF) މެދުވެރިކޮށެވެ. މި މައްސަލައާ ގުޅިގެން ފަރަންސޭސިވިލާތުގެ ކަމާބެހޭ އިދާރާތަކުން ވަނީ އެ އުފެއްދުންތައް ބާޒާރުން ނަގައި، ވިއްކުން ހުއްޓާލުމަށާއި، މިހާރު ހުރި ސްޓޮކްތައް ނައްތާލުމަށް އަންގާފަ އެވެ.
'ސެރެއުލައިޑް' އަކީ 'ބެސިލަސް ސިރިއަސް' ކިޔާ ބެކްޓީރިއާއަކުން އުފެދޭ ވިހަ މާއްދާއެކެވެ. މި މާއްދާއިން ތަޣައްޔަރުވެފައިވާ ކިރު ބޭނުންކުރުމުން މޭ ނުބައިކުރުމާއި، ހޮޑުލުމުގެ އިތުރުން ބަނޑުގައި ރިއްސުން ފަދަ ސިއްހީ އެކި މައްސަލަތައް ކުރިމަތިވުމުގެ ނުރައްކާ އޮވެ އެވެ.
އާންމު ސަލާމަތާއި ރައްކާތެރިކަމަށްޓަކައި، ކަނޑައެޅިފައިވާ ވަކި ބެޗްތަކެއްގެ އުފެއްދުންތައް ބޭނުންކުރުމާއި ވިޔަފާރީގެ މުއާމަލާތްތަކުގައި ބޭނުންކުރުން މިހާރު ވަނީ މަނާކުރެވިފަ އެވެ. މިކަމާ ގުޅޭ އިތުރު ތަފްސީލު ބޭނުންފުޅުވާ ނަމަ، އެމްއެފްޑީއޭގެ ހޮޓްލައިން ނަންބަރު 7603204 ނުވަތަ 3034213 އަށް ގުޅުއްވައިގެން މަޢުލޫމާތު ސާފުކުރެއްވުމަށް އެ އޮތޯރިޓީން އިރުޝާދު ދެއްވަ އެވެ.
