ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ދަށުން، ސެގްމެންޓް 2ގައި ތާރު އަޅަން ތައްޔާރު ވެއްޖެ އެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފައިވާ ގޮތުގައި، ބާޒާރުމަތީ މަގުގެ ސަބް-ބޭސް އެޅުމުގެ އަމަލީ މަސައްކަތް މިހާރު ވަނީ ފަށާފައެވެ. އަދި މި ހަފުތާގެ ތެރޭގައި އޭބީސީ ފަށަލަ އެޅުމާއި ތާރު އެޅުމުގެ މަސައްކަތް ފެށުމަށް ވަނީ ތާވަލުކުރެވިފަ އެވެ.

މީގެއިތުރުން، މަގުބައްތި ހަރުކުރުމާއި ޓްރެފިކް ނިޝާންތައް ބެހެއްޓުމުގެ މަސައްކަތްވެސް މި މުއްދަތުގެ ތެރޭގައި ކުރިއަށްދާނެ އެވެ. އެމްޓީސީސީން ބުނެފައިވާ ގޮތުގައި، ބާޒާރުމަތީ ސަރަހައްދު ތަރައްގީކުރުމުގެ މަސައްކަތް ކުރިއަށްދަނީ ކަނޑައެޅިފައިވާ ތާވަލާ އެއްގޮތަށް ބާރު ސްޕީޑުގަ އެވެ. މި މަޝްރޫއުގެ ދަށުން ލޯކަލް މާރުކޭޓުން ފެށިގެން ނޯތު ހާބަރާ ހަމައަށް 250 މީޓަރުގެ ސަރަހައްދެއްގައި ތާރު އަޅައިގެން ޒަމާނީ ފެންވަރަށް ތަރައްގީކުރާނެ އެވެ.

މި މަސައްކަތް ނިމުމުން، ބާޒާރުމަތީ ސަރަހައްދަކީ ދެކޮޅަށް ދުއްވޭ، ހިނގާބިނގާވެ އުޅޭ މީހުންނަށް ރައްކާތެރި އަދި ފެންބޮޑުވުމުގެ މައްސަލައަށް ދާއިމީ ހައްލެއް ލިބިފައިވާ ތަނަކަށް ވެގެންދާނެ އެވެ. މުޅި މަޝްރޫއު ނިމޭއިރު، ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް ޖުމްލަ 1,088 މީޓަރުގެ ސަރަހައްދެއް އައު ފެންވަރަކަށް ބަދަލުވެގެންދާނެ އެވެ.