މޯލްޑިވްް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބޮޑުކަންނެލި މަސްވެރިންނަށް ހާއްސަ ލުއިތަކެއް ދިނުމުގެ ގޮތުން "ބޮޑުކަންނެލި މަސްވެރިންގެ ޔޫނިއަން" (ބީކޭއެމްޔޫ) އާ އެކު މުހިންމު އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމުގައި ދެފަރާތުން ސޮއިކޮށްފައިވަނީ މިހާރު ހުޅުމާލެ ސެންޓްރަލް ޕާކުގައި ކުރިއަށްދާ "މޯލްޑިވްސް މެރިން އެކްސްޕޯ" ގެ ތެރެއިންނެވެ. މިއީ އެމްޓީސީސީން މަސްވެރިންގެ މިފަދަ ޖަމިއްޔާއަކާއެކު ވިޔަފާރީގެ ގުޅުން ގާއިމުކުރުމަށް ސޮއިކުރި ފުރަތަމަ އެއްބަސްވުންކަމަށް އެ ކުންފުނިން މައުލޫމާތުދެ އެވެ. މި އެއްބަސްވުމުގެ ދަށުން އެމްޓީސީސީގެ "ކަށަވަރު" ޝޯރޫމުން ވިއްކާ ތަފާތު އުފެއްދުންތަކުން ބޮޑުކަންނެލި މަސްވެރިންގެ ޔޫނިއަންގެ މެންބަރުންނަށް ބޮޑެތި ޑިސްކައުންޓުތަކެއް ލިބޭނެ އެވެ.
އެގޮތުން:
- ޔަމަހާ އިންޖީނުގެ ސްޕެއާ ޕާޓްސްތަކުން 10 އިންސައްތައިގެ ޑިސްކައުންޓް.
- ކާސްޓްރޯލް ބްރޭންޑުގެ އުފެއްދުންތަކުން 8 އިންސައްތައިގެ ޑިސްކައުންޓް.
އެމްޓީސީސީން ހާމަކުރި ގޮތުގައި މި އެއްބަސްވުމުގެ އެންމެ ބޮޑު މަގުސަދަކީ މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ބޭނުންވާ މުހިންމު ސާމާނުތައް އަގުހެޔޮކޮށް ފަސޭހަކަމާއެކު ލިބޭނެ އިންތިޒާމު ހަމަޖައްސައިދިނުމެވެ. އަދި މީގެ ސަބަބުން މަސްވެރިން އިންޖީނު މަރާމާތު ކުރުމަށާއި ބެލެހެއްޓުމަށް ކުރާ ހޭދަ ކުޑަވެގެންދާނެ ކަމަށް އެ ކުންފުނިން އުންމީދު ކުރެއެވެ.
