ކުރިއަށް އޮތް ރޯދަ މަހާއި ހަ ރޯދައިގެ މުއްދަތުގައި، މާލެ ސަރަހައްދުގެ ގޭބީސީތަކުން ކުނި އުކާލުމަށް ހަމަޖެހިފައިވާ ގަޑިތައް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އާންމުކޮށްފި އެވެ.

މި އަންނަ އާދިއްތަ ދުވަހުން ފެށިގެން އަމަލުކުރަން ފަށާ މި އުސޫލުގެ ދަށުން، މާލޭގެ ގޭބީސީތަކުން ކުނި ނެގުމަށް ހަމަޖެހިފައިވަނީ ރޭގަނޑު 20:30 އިން ފަތިހު 02:00 އަށެވެ. ހުޅުމާލޭގައި ކުނި ނެގުމަށް ހަމަޖެހިފައިވަނީ ރޭގަނޑު 21:00 އިން ފަތިހު 02:30 އަށެވެ. އަދި ވިލިމާލޭގެ ގޭބީސީތަކުން ކުނި ނަގާނީ ރޭގަނޑު 21:00 އިން މެންދަމު 01:00 އަށެވެ.

ވެމްކޯއިން ބުނެފައިވަނީ ކުނި ނަގަން ފަށާ ވަގުތަށްވުރެ ލަހުން ކުނި ނެރޭ ގޭބީސީތަކަށް ހިދުމަތް ދިނުމުގައި ދަތިތަކެއް ކުރިމަތިވެދާނެތީ، ކަނޑައެޅިފައިވާ ވަގުތުގެ ކުރިން ކުނި ނެރުމަށް އިލްތިމާސްކުރާ ކަމަށެވެ. މީގެއިތުރުން، ރޯދަ މަހާ ގުޅިގެން ގޭތެރެ ސާފުކުރުމަށްފަހު އުފެދޭ ކުނި މަގުމައްޗަށް ނޭޅުމަށާއި، ކުނި އުކާލުމުގައި ކަނޑައެޅިފައިވާ ގަވާއިދުތަކާ އެއްގޮތަށް އަމަލުކުރުމަށްވެސް އެ ކުންފުނިން ވަނީ ތަކުރާރުކޮށް އިލްތިމާސްކޮށްފަ އެވެ.

ކަލަންޑަރުގައިވާގޮތުން ފެބްރުއަރީ 17 އަކީ ރަމަޟާން މަހުގެ ފުރަތަމަ ދުވަހެވެ.