މާލޭގެ ވިޔަފާރި ބަނދަރު ކ. ތިލަފުއްޓަށް ބަދަލުކުރުމުގެ މަޝްރޫއުގެ ފުރަތަމަ ފިޔަވަހީގެ މަސައްކަތް ކުރުމަށް މިއަދު އަމިއްލަ ކުންފުންޏަކާ ހަވާލުކޮށްފި އެވެ.
މި މަޝްރޫއުގެ ފުރަތަމަ ފިޔަވަހީގެ ދަށުން ކުރަންޖެހޭ ޑިޒައިން އަދި ސާވޭގެ މަސައްކަތްތައް ހަވާލުކޮށްފައިވަނީ ޗައިނާ ހާބަރު އިންޖިނިއަރިން ކޮމްޕެނީ (ސީއެޗްއީސީ)އާ އެވެ. މިއަދު މެންދުރު މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ހެޑް އޮފީހުގައި ބޭއްވި ހާއްސަ ރަސްމިއްޔާތެއްގައި މިކަމާ ގުޅޭ އެއްބަސްވުމުގައި ވަނީ ސޮއިކޮށްފަ އެވެ. އެމްޕީއެލްގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ ޗީފް އެގްޒެކުޓިވް އޮފިސަރު މުހައްމަދު ރިޝްވާނެވެ. ސީއެޗްއީސީގެ ފަރާތުން ސޮއިކުރެއްވީ އެ ކުންފުނީގެ ކަންޓްރީ މެނޭޖަރ މާއޯ ބާއޯ އެވެ.
މި އެއްބަސްވުމުގެ ދަށުން ސީއެޗްއީސީން ކުރިއަށް އޮތް ފަސް މަސް ދުވަހުގެ ތެރޭގައި ބަނދަރުގެ ޑިޒައިން އަދި ސާރވޭގެ މަސައްކަތްތައް ނިންމަންޖެހެ އެވެ. މި މަސައްކަތް ނިމުމުން، ދެ ފަރާތުން އެއްބަސްވާ އަގެއްގެ މައްޗަށް ބިނާކޮށް، ބަނދަރު އިމާރާތްކުރުމުގެ އަމަލީ މަސައްކަތް އެ ކުންފުންޏާ ހަވާލުކުރުމަށް ވަނީ ހަމަޖެހިފަ އެވެ.
ރާއްޖޭގެ މައި ވިޔަފާރި ބަނދަރު ތިލަފުއްޓަށް ބަދަލުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން ނުހަނު އިސްކަމެއް ދެއްވާ މަޝްރޫއެކެވެ. އެގޮތުން، މިއަދު އިއްވެވި 2026 ވަނަ އަހަރުގެ ރިޔާސީ ބަޔާނުގައިވެސް ރައީސް ވަނީ މި މަޝްރޫއުގެ މުހިންމުކަން ފާހަގަކުރައްވާފަ އެވެ. ރައީސް ވިދާޅުވި ގޮތުގައި، ބަނދަރު ބަދަލުކުރުމުގެ މަސައްކަތް ބާރުދުވެލީގައި ކުރިއަށް ގެންގޮސް، 2027 ވަނަ އަހަރުގެ ނިޔަލަށް ވިޔަފާރި ބަނދަރު ތިލަފުއްޓަށް މުޅިން ބަދަލުކުރެވޭނެ އެވެ.
