ސަރުކާރުގެ އަމާޒުތައް ހާސިލުކޮށް، ގައުމަށް ބޭނުންވާ ތަރައްގީއާއި ފާގަތިކަން ގެނެވޭނީ ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ސަރުކާރު ހިންގާ ޕީއެންސީގެ ކެންޑިޑޭޓުން އިންތިހާބުކޮށްގެން ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެ އެވެ.
މާލޭ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސްކަމަށް ޕީއެންސީގެ ފަރާތުން ވާދަކުރައްވާ އައިޝަތު އަލައިކާ އަދުނާންގެ ކެމްޕޭން ޖަގަހަ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ފަސްޓް ލޭޑީ ވިދާޅުވީ، އަންހެނުންގެ ކޮމިޓީތަކަކީ ރައްޔިތުންނާ އެންމެ ގާތުން މަސައްކަތްކޮށް، ރައްޔިތުންގެ ޝުއޫރުތަކާއި ބޭނުންތައް އެންމެ ބޮޑަށް ދެނެގަނެވޭނެ ފަރާތްތައް ކަމަށެވެ.
"ގިނަ ފަހަރު އަޅުގަނޑަށް ވެސް އަންހެން ބޭފުޅުން ކައިރީގައި ބުނެލަން ބޭނުންވާ ވާހަކަތައް ބުނެލަން ފަސޭހަވޭ. ހިއްސާކުރަން ފަސޭހަވޭ. އެހެންވީމާ އެންމެ ގާތުން ރައްޔިތުން ދިރިއުޅެމުންދާނެ ގޮތް ދެކޭނެ އަދި ފެންނާނެ ބޭފުޅުންނަކީ ކޮމިޓީގެ ބޭފުޅުން ކަން ޔަގީން،" ފަސްޓް ލޭޑީ ވިދާޅުވި އެވެ.
އެކަމަނާ އިތުރަށް ފާހަގަކުރެއްވި ގޮތުގައި، ރައްޔިތުންގެ ކަންބޮޑުވުންތައް ކައުންސިލްތަކާ ހަމައަށް ފޯރުކޮށްދިނުމުގައި އަންހެނުންގެ ކޮމިޓީތަކުން މުހިންމު ދައުރެއް އަދާކުރެއެވެ. އެހެންކަމުން، އެ ކޮމިޓީތަކަށް ހޮވޭ ބޭފުޅުންނަކީ ސަރުކާރާއި ރައްޔިތުންނާ ދެމެދު އޮންނަ ގުޅުން ހަރުދަނާކޮށްދޭނެ ބަޔަކަށް ވާންޖެހޭނެ ކަމަށާއި، އެ މަގްސަދު ހާސިލުކުރެވޭނީ ސަރުކާރުގެ ސިޔާސަތުތަކާ އެއްގޮތަށް މަސައްކަތްކުރާނެ ޕީއެންސީގެ ކެންޑިޑޭޓުން އިންތިހާބުކޮށްގެން ކަމަށް އެކަމަނާ ވިދާޅުވި އެވެ.
