ރައްޔިތުންގެ ކަންބޮޑުވުންތަކާއި ޝަކުވާތައް 24 ގަޑިއިރު ހުށަހެޅޭނެ އިންތިޒާމެއް ހަމަޖެއްސެވުމަށްޓަކައި، ހާއްސަ ބިއުރޯއެއް ގާއިމުކުރެއްވުމަށް ނިންމަވާފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރައްވައިފި އެވެ.

މިއަހަރުގެ ރިޔާސީ ބަޔާން އިއްވަވަމުން ރައީސް ވިދާޅުވީ، މި ސަރުކާރުގެ އަމާޒަކީ ރައްޔިތުންނާ ގާތުން މަސައްކަތްކޮށް، ރައްޔިތުންގެ އަޑުއަހާ ސަރުކާރެއްގެ ގޮތުގައި ކުރިއަށް ދިއުން ކަމަށެވެ. މި މަގްސަދު ހާސިލުކުރުމަށްޓަކައި، "ސިޓިޒަންސް ކޮމްޕްލެއިންޓްސް ބިއުރޯ" ގެ ނަމުގައި ރައީސް އޮފީހުގައި 24 ގަޑިއިރު ހިދުމަތްދޭނެ ވަކި އިދާރާއެއް އުފެއްދެވުމަށް ނިންމަވާފައިވާ ކަމަށް އެމަނިކުފާނު ވިދާޅުވި އެވެ.

މި ބިއުރޯގެ މައިގަނޑު މަސައްކަތަކީ، ރައްޔިތުން ހުށަހަޅާ ޝަކުވާތައް ޒަމާނީ ޑިޖިޓަލް ނިޒާމެއްގެ ތެރެއިން ބަލައިގަނެ، އެކަންކަމާ ގުޅޭގޮތުން ދައުލަތުގެ ކަމާބެހޭ މުއައްސަސާތަކުން މައުލޫމާތު ސާފުކުރުމަށްފަހު، އެކަށީގެންވާ ޖަވާބެއް ދިނުމެވެ. ރައްޔިތުންނަށް ދިމާވާ ދަތިތަކާއި ޝަކުވާތައް ސިޓީ، އީމެއިލް، ފޯނު، ސޯޝަލް މީޑިއާ، އަދި ޖެމްސް ފަދަ ތަފާތު ވަސީލަތްތައް މެދުވެރިކޮށް ފަސޭހަކަމާއެކު ހުށަހެޅޭނެ ކަމަށް ރައީސް ފާހަގަކުރެއްވި އެވެ.

"މި ބިޔުރޯގެ ބައެއްގެ ގޮތުގައި 24 ގަޑިއިރު ޚިދުމަތް ފޯރުކޮށްދޭ "ކޯލް ސެންޓަރ"އެއް ގާއިމުކުރާނަން. ހަމަ އެއާއެކު، ސަރުކާރުގެ ވަކިވަކި އިދާރާތަކަށް ހުށަހެޅޭ ޝަކުވާތައް މެނޭޖުކޮށް، އެ ޝަކުވާތަކަށް ޖަވާބު ދިނުމަށް ސަރުކާރުގެ ވަކިވަކި އިދާރާތަކުގައި "ސިޓިޒަންސް ކޮމްޕްލެއިންޓްސް ބިއުރޯ"ގެ ޑިޖިޓަލް ސިސްޓަމް ބޭނުންކުރާގޮތަށް ހަމަޖައްސައި ސަރުކާރުގެ ހުރިހާ އިދާރާތަކަށް ހުށަހެޅޭ ޝަކުވާތައް "ވަން ސިންގަލް ކޮމްޕްލެއިންޓްސް މެނޭޖްމަންޓް މެކޭނިޒަމް"ގެ ތެރެއިން މެނޭޖުކުރުމުގެ އިންތިޒާމު ހަމަޖެހިފައި ހުންނާނެ." ރައީސްވިދާޅުވި އެވެ.

މީގެ އިތުރުން، ސަރުކާރުގެ ވަކިވަކި އިދާރާތަކަށް ހުށަހެޅޭ ޝަކުވާތައްވެސް ހަރުދަނާކަމާއެކު ބަލައި، ޖަވާބުދާރީވުމަށްޓަކައި، މި ބިއުރޯގެ ޑިޖިޓަލް ނިޒާމު ހުރިހާ އިދާރާތަކެއްގައި ބޭނުންކުރެވޭ ގޮތަށް އިންތިޒާމު ކުރައްވާނެ ކަމަށްވެސް ރައީސް ވިދާޅުވި އެވެ.