ރާއްޖޭގެ ފަތުރުވެރިކަމުގެ ސިނާއަތުން ލިބޭ މަންފާ ހުރިހާ ރައްޔިތުންނަށް ހަމަހަމަކަމާއެކު ފޯރުކޮށްދިނުމަށްޓަކައި، ދިވެހީންގެ ނަމުގައި މަދުވެގެން 10 ރިސޯޓު ތަރައްގީކުރަން ނިންމަވާފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އިއުލާނު ކުރައްވައިފި އެވެ.

އެމަނިކުފާނު މިފަދައިން ވިދާޅުވީ، މި އަހަރުގެ ރައްޔިތުންގެ މަޖިލީހުގެ މަސައްކަތް ފެށުމަށް ބޭއްވި ޖަލްސާގައި 2026 ވަނަ އަހަރުގެ ރިޔާސީ ބަޔާން އިއްވަވަމުންނެވެ.

ރައީސް ވިދާޅުވީ، ރާއްޖޭގެ ފަތުރުވެރިކަމަށް ފަންސާހަށްވުރެ ގިނަ އަހަރު ވެފައިވާއިރު، އެ ސިނާއަތުގެ ފައިދާ ސީދާ ގޮތެއްގައި ހުރިހާ ރައްޔިތުންނަށް ލިބޭނެ އިންތިޒާމެއް މިހާތަނަށް ގާއިމުވެފައި ނެތުމަކީ ބަލައިގަނެވޭނެ ކަމެއް ނޫންކަމަށެވެ. އަދި ރާއްޖޭގެ ފަޅުތަކާއި ރަށްތަކަކީ ދިވެހި ހުރިހާ ރައްޔިތުންގެ މިލްކަކަށް ވީހިނދު، އެ ތަންތަނުން ލިބޭ މަންފާގައި ހުރިހާ ރައްޔިތުންގެވެސް ހިއްސާ އޮންނަންޖެހޭނެ ކަމަށެވެ.

"މިކަމާ މެދު ކެބިނެޓުގައި މަޝްވަރާކޮށް، ސަރުކާރުން މިހާރު ނިންމާފައިވަނީ، ސަރުކާރުގެ ކުންފުންޏެއް މެދުވެރިކޮށް ކުރިޔަށް އޮތް 3 އަހަރު ދުވަހުގެ ތެރޭގައި މަދުވެގެން 10 ރިސޯޓު ތަރައްޤީކޮށް އެ ރިސޯޓުތަކުން ލިބޭ ފައިދާގެ ބޮޑުބައެއް، ހަމަ އެއްވެސް ރައްޔިތަކު ބާކީނުކޮށް، ރާއްޖޭގެ ކޮންމެ ރައްޔިތެއްގެ ބޭންކް އެކައުންޓަށް، ހަމަހަމަ ކަމާއެކު، އަހަރަކު އެއްފަހަރު، ބޭރު ފައިސާއިން ޖަމާކޮށްދޭން." ރައީސް ވިދާޅުވި އެވެ.

މީގެއިތުރުން، މި މަޝްރޫއުގެ ދަށުން ތަރައްގީކުރާ ރިސޯޓުތަކަކީ ދިވެހި ކޮންމެ ރައްޔިތެއްގެ ހިއްސާ އޮންނާނެ ތަންތަންކަން ގާނޫނީ ބާރުވެރިކަމާއެކު ކަށަވަރުކޮށްދެއްވާނެ ކަމަށް ރައީސް ވިދާޅުވި އެވެ.

އަދި މި ރިސޯޓުތައް ތަރައްގީކޮށް ނިންމުމަށްފަހު، 2030 ވަނަ އަހަރުން ފެށިގެން ކޮންމެ އަހަރަކު ހުރިހާ ރައްޔިތުންނަށް ފައިދާ ބަހަން ފެށުމަކީ ސަރުކާރުގެ އަމާޒެއްކަމަށް ރައީސް ވިދާޅުވި އެވެ. ރައީސް އަންދާޒާ ކުރައްވާ ގޮތުގައި، މި މަޝްރޫއުގެ ނަތީޖާއެއްގެ ގޮތުން ކޮންމެ ރައްޔިތެއްގެ ބޭންކު އެކައުންޓަށް އަހަރަކު ގާތްގަނޑަކަށް 400 ޑޮލަރުގެ ފައިދާއެއް ޖަމާކުރެވިގެންދާނެ އެވެ.