ފިނޭންސް މިނިސްޓްރީން ޕެންޝަން އޮފީހަށް ހުށަހަޅާފައިވާ 2.4 ބިލިއަން ރުފިޔާގެ ބޮންޑު އިންވެސްޓްމަންޓުގެ ސަބަބުން ޕެންޝަން ފަންޑަށް އެއްވެސް އުނިކަމެއް ނުވަތަ ގެއްލުމެއް ނުވާނެ ކަމަށް އެ އޮފީހުން ބުނެފި އެވެ.
ޕެންޝަން އޮފީހުން ނެރުނު ބަޔާނެއްގައި ބުނީ، މިނިސްޓްރީން ހުށަހަޅާފައިވަނީ ދިވެހި ރުފިޔާ އާއި އެމެރިކާ ޑޮލަރުން މަންފާ ލިބޭ ގޮތަށް ފަރުމާކޮށްފައިވާ 2.4 ބިލިއަން ރުފިޔާގެ ބޮންޑެއްގައި އިންވެސްޓް ކުރުމަށެވެ. މި އިންވެސްޓްމަންޓަށް ބޭނުންވާ ފައިސާ ހަމަޖެއްސުމަށް ހަމަޖެހިފައިވަނީ، އެ އޮފީހުން ބުނިގޮތުގައި ޕެންޝަން ސްކީމުން މިހާރު އިންވެސްޓްކޮށްފައިވާ ބޮންޑުތަކުގެ ތެރެއިން 2.4 ބިލިއަން ރުފިޔާގެ ބޮންޑު ސެކަންޑަރީ މާކެޓުގައި ވިއްކާލައިގެން ލިބޭ ފައިސާއިންނެވެ.
އެ އޮފީހުން ބުނީ މި މުއާމަލާތް ކުރިއަށް ގެންދިއުމުގައި، ސެކަންޑަރީ މާކެޓުގައި ބޮންޑުތައް ވިއްކާލާނީ ފަންޑަށް ގެއްލުން ނުވާނެ ފަދަ ގޮތަކަށް ކަމަށެވެ. އަދި އެ ނިންމުން ނިންމާފައިވަނީ ޕެންޝަން ސްކީމުގެ ދުރުރާސްތާ އިންވެސްޓްމަންޓް ސްޓްރެޓެޖީ އެކުލަވައިލާ ކޮންސަލްޓެންޓުންގެ ފަންނީ ލަފަޔަށް ރިއާޔަތްކުރުމަށްފަހު ކަމަށްވެސް އެ ބަޔާނުގައި ފާހަގަކޮށްފައިވެ އެވެ.
މި ބޮންޑު އިންވެސްޓްމަންޓުގެ ސަބަބުން ބާޒާރުން ބޭރު ފައިސާ ގަންނަން ނުޖެހި، އިންވެސްޓްމަންޓުގެ ތެރެއިން ޕެންޝަން ފަންޑުގައި ބޭރު ފައިސާގެ ރިޒާވެއް ބިނާކުރެވޭނެ ކަމަށް އެ އޮފީހުން ބުންޏެވެ. އަދި މި މުޅި މުއާމަލާތަކީ ޕެންޝަން ގާނޫނާއި ގަވާއިދުތަކުގެ އިމުގެ ތެރެއިން ހިންގޭ ހަރުދަނާ އިންވެސްޓްމަންޓެއް ކަމަށްވެސް ޕެންޝަން އޮފީހުން ކަށަވަރުކޮށްދެ އެވެ.
ޕެންޝަން ފަންޑުގައި މިހާރު ހުރި 2.4 ބިލިއަން ރުފިޔާގެ ސަރުކާރު ބޮންޑު އެމްއެމްއޭ އަށް ވިއްކާލުމަށްފަހު، އެ ފައިސާ ބޭނުންކޮށްގެން ސަރުކާރުން އަލަށް ދޫކުރާ 2.5 ބިލިއަން ރުފިޔާގެ ބޮންޑު ޕެންޝަން އޮފީހުން ގަތުމަށް ވަނީ ހަމަޖެހިފަ އެވެ.
