ރައީސުލްޖުމްހޫރިއްޔާ ރިޔާސީ ބަޔާން އިއްވެވުމަށް މާދަމާ ބާއްވާ ރައްޔިތުންގެ މަޖިލީހުގެ ޖަލްސާއާ ގުޅިގެން މާލޭގެ ގްރީން ޒޯނުގައި ޕާކުކޮށްފައިވާ އުޅަނދުތައް ނަގަން އަންގައިފި އެވެ.
ރިޔާސީ ބަޔާން އިއްވުމަށް މާދަމާ ބާއްވާ މި އަހަރުގެ ފުރަތަމަ ދައުރުގެ ފުރަތަމަޖަލްސާއާ ގުޅިގެން، ސަލާމަތީ ފިޔަވަޅެއްގެ ގޮތުން އެ ސަރަހައްދު ހުސްކުރުމަށް ފުލުހުން ވަނީ ނިންމާފަ އެވެ. އެހެންވެ. އެ ސަރަހައްދުގައި ޕާކުކޮށްފައިވާ އުޅަނދުތައް މިއަދު 18:00 ގެ ކުރިން ނެގުމަށް ވަނީ އަންގާފަ އެވެ.
އުޅަނދުތައް ނެގުމަށް އަންގާފައިވާ ސަރަހައްދުތަކަކީ:
- މެދުޒިޔާރަތް މަގު (ސޯސަންމަގުން ފެށިގެން މުލީއާގެއާ ހަމައަށް)
- ހަކުރާ ގޯޅި
- ސިއްކަ ގޯޅި
- ޝަހީދު އަބްދުﷲ ޒުހައިރު ގޯޅި
- އަމީރުއަހްމަދު މަގު (ވެލާނާގެ ސަރަހައްދު)
މިފަދަ ކަންކަމުގައި އާންމު ރައްޔިތުންގެ ފަރާތުން ލިބޭ އެއްބާރުލުން ފާހަގަކޮށް ފުލުހުން ވަނީ މަގުތައް ބަންދުކުރުމާއި ޕާކިން ހުސްކުރުމުގެ ސަބަބުން އާންމުންނަށް ދިމާވެދާނެ ދަތިތަކަށްޓަކައި އެ އިދާރާއިން މައާފަށް އެދިފަ އެވެ.
ކޮންމެ އަހަރަކުވެސް ރިޔާސީ ބަޔާން އިއްވާ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސާފައިވާ ދުވަހަކަށް ވާތީ، މާދަމާއަކީ ސަރުކާރު ބަންދު ދުވަހެކެވެ. ރިޔާސީ ބަޔާން އިއްވުމަށް ބާއްވާ މަޖިލީހުގެ ޖަލްސާ ފެށުމަށް ހަމަޖެހިފައިވަނީ މާދަމާ ހެނދުނު 09:00ގަ އެވެ.
