ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބާ ގުޅިގެން، އިލެކްޝަންސް ކޮމިޝަނާއި ދިވެހި ފުލުހުންގެ ހިދުމަތާ ދެެމެދު އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގައި އިލެކްޝަން ކޮމިޝަންގެ ފަރާތުން ސޮއިކުރެއްވީ، އެ ކޮމިޝަންގެ ރައީސް މުހައްމަދު ޒާހިދު އެވެ. އަދި ފުލުހުންގެ ފަރާތުން ސޮއިކުރެއްވީ، ކޮމިޝަނާ އޮފް ޕޮލިސް އިސްމާއިލް ނަވީން އެވެ.

މި އެއްބަސްވުމުގެ ދަށުން އިންތިހާބާ ގުޅޭ ގާނޫނުތަކާއި ގަވާއިދުތައް ތަންފީޒުކުރުމުގައާއި، އިންތިހާބުގެ ލޮޖިސްޓިކްސް އަދި ސަލާމަތީ ކަންކަން ބެލެހެއްޓުމުގައި ފުލުހުންގެ ފުރިހަމަ އެހީތެރިކަން ލިބިގެންދާނެ ކަމަށް އިލެކްޝަންސް ކޮމިޝަނުން ބުންޏެވެ.

މީގެއިތުރުން، އިންތިހާބުގެ އެކި މަރުޙަލާތަކުގައި ކޮމިޝަނުން އެދޭ ކަންކަމުގައި ފުލުހުންގެ އެއްބާރުލުން ލިބުމަކީ، އިންތިހާބުގެ މަސައްކަތްތައް ހަލުވިކޮށް އަދި އޮމާންކަމާއެކު ކުރިއަށް ގެންދިއުމަށް ލިބޭނެ ވަރަށް ބޮޑު ފަސޭހައެއްކަން އެ ކޮމިޝަނުން ބުންޏެވެ.

4 އޭޕްރިލް ގައި ބާއްވާ ލޯކަލް ކައުންސިލް އިންތިހާބުގައި ލޯކަލް ކައުންސިލުތަކަށް 678 މެންބަަރުން ކުރިމަތިލާނެ އެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މަގާމަށް 678 މެންބަރުން ކުރިމަތިލާނެ އެވެ.

މި އިންތިހާބުގައި ވޯޓުލުމުގެ ހައްގު ލިބިފައިވަނީ ޖުމްލަ 249،937 މީހަކަށެވެ. އެއީ 144،527 އަންހެނުންނާއި، 150،410 ފިރިހެނުންނަށެވެ.