ކ. ހުރާގައި ފަތުރުވެރިކަން ތަރައްގީ ކުރުމަށް ގެސްޓް ހައުސްތައް އިމާރާތް ކުރަން 25 ބިމެއް 50 އަހަރަށް ކުއްޔަށް ދޫކުރަން އެ ރަށު ކައުންސިލުން އިއުލާނުކޮށްފި އެވެ.
މި 25 ބިން ދޫކުރަން ނިންމާފައި ވަނީ ހުރާ ގައި ފަތުރުވެރިކަން ތަރައްގީކުރުމަށް އަލަށް ހިއްކާފައިވާ ސަރަހައްދުންނެވެ. އެގޮތުން މި ދޫކުރާ 25 ބިމުގެ ތެރެއިން 8 ބިމަށް އެދި ހުށައެޅޭނީ ހަމައެކަނި ހުރާގައި ރަށްވެހިވެފައިވާ ފަރާތްތަކަށެވެ. މި 8 ބިޑް ފޯމްގެ އަގަކީ 10,000 ރުފިޔާ އެވެ. ރަށު ކައުންސިލުން ބުނި ގޮތުގައި ބިޑް ގަތުމަށް އެދޭ ފޯމްތައް ބަލައިގަތުން އަދި ބިޑް ފޯމްތައް ދޫކުރުން ފެބްރުއަރީ 11 ވަނަ ދުވަހުގެ 12:30 ނިޔަލަށް ކައުންސިލުގެ ރިސެޕްޝަން އިން އަދި މެއިލްގެ ޒަރިއްޔާއިން ލިބެންހުންނާނެ އެވެ.
މީގެއިތުރުން ދޫކުރާ ބިންތަކުގެ ތެރެއިން، 17 ބިމުގެ ބިޑް ފޯމެއްގެ އަގަކީ 25,000.00 ރުފިޔާ އެވެ. މި ބިމުގެ ބިޑް ގަތުމަށް އެދޭ ފޯމްތައްވެސް ފެބްރުއަރީ 12 ވަނަ ދުވަހުގެ 12:30 ނިޔަލަށް ކައުންސިލުގެ ރިސެޕްޝަން އިން އަދި މެއިލްގެ ޒަރިއްޔާއިން ލިބެންހުންނާނެ އެވެ. އަދި، މި ބީލަމާ ގުޅިގެން ބާއްވާ މައުލޫމާތު ދިނުމުގެ ބައްދަލުވުން ފެބްރުއަރީ 15 12:15 ގައި ހުރާ ކައުންސިލްގެ އިދާރާގެ ހުރަވީ މާލަމުގަ އޮންނާނެ ކަމަށް ކައުންސިލުން ބުންޏެވެ.
އެހެންވެ، އެކަމަށް ޝައުގުވެރިވާ ފަރާތްތަކުން މި މަހުގެ 26 ވަނަ ދުވަހުގެ 1:00 އަށް ކައުންސިލުގެ އިދާރާ އަށް އަންދާސީ ހިސާބު ހުށަހެޅުމަށް އިއުލާނުގައި ބުންޏެވެ. އަދި ކައުންސިލުން ބުނީ އަންދާސީ ހިސާބު ހުށަހަޅަން ވާނީ ބީލަން ހުށަހަޅާ ފޯމު ފުރިހަމަކޮށް، ހުށަހަޅަންޖެހޭ ލިޔުންތަކާ އެކު ހުރާ ކައުންސިލް އިދާރާ އަށް ކަމަށެވެ. އެކަމާ ގުޅޭ އިތުރު މައުލޫމާތު ސާފުކުރުމަށް އެ ރަށު ކައުންސިލުގެ info@huraa.gov.mv އަށް މެއިލް ކުރުމަށްވެސް އިއުލާނުގައި އެދިފައި ވެ އެވެ.
