ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޑިރެކްޓާ ޖެނެރަލް އޮފް ޕަބްލިކް ހެލްތުގެ މަގާމަށް ކުރިމަތިލުމުގެ ފުރުސަތު ސިވިލް ސާވިސް ކޮމިޝަނުން ހުޅުވާލައިފި އެވެ.

މި މަގާމަކީ ރާއްޖޭގެ އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން ބޮޑެތި ޒިންމާތަކެއް ހަވާލުކުރެވިފައިވާ މުހިންމު މަގާމެކެވެ. މިގޮތުން އާންމު ސިއްހަތުގެ ގާނޫނު  ތަންފީޒުކުރުމާއި، އާންމު ސިއްހަތު ރައްކާތެރިކުރުމުގެ ގައުމީ ޕްރޮގްރާމްތައް ވިލަރެސްކުރުމުގެ އިތުރުން، ގައިންގަޔަށް އަރާ ބަލިތަކާއި ނާރާ ބަލިތައް ކޮންޓްރޯލް ކުރުމުގެ ކަންކަން ބެލެހެއްޓުމަކީ މި މަގާމުގެ މައިގަނޑު މަސްއޫލިއްޔަތުތަކެވެ.

މީގެއިތުރުން، އެޗްޕީއޭ ހަރުދަނާ ގޮތެއްގައި ހިންގުމާއި، އާންމު ސިއްހަތާ ގުޅޭ އިރުޝާދުތައް ނެރުމާއި، އަޅާ ފިޔަވަޅުތައް މިނިސްޓަރަށް ރިޕޯޓްކުރުންވެސް މި މަގާމުގެ ޒިންމާތަކުގެ ތެރޭގައި ހިމެނެ އެވެ. މި މަގާމަށް ހޮވޭ ފަރާތަކަށް މުސާރައާއި އިނާޔަތުގެ ގޮތުގައި ޖުމްލަ 34،757 ރުފިޔާލިބޭނެ އެވެ. އަދި، ސިވިލް ސާވިސްގެ މުވައްޒަފުންނަށް ދެވޭ ސިއްހީ ހިދުމަތާއި ޕެންޝަން ކޮންޓްރިބިއުޝަންވެސް ލިބޭނެ އެވެ.

މި މަގާމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި، މޯލްޑިވްސް ނޭޝަނަލް ކޮލިފިކޭޝަންސް ފްރޭމްވޯކްގެ ލެވެލް 9 ގެ ސަނަދެއް ހާސިލުކޮށްފައިވުމާއެކު، އިދާރީ ހިންގުމުގެ ދާއިރާގައި މަދުވެގެން 8 އަހަރު ދުވަހުގެ ތަޖުރިބާ ލިބިފައިވުން ހިމެނެ އެވެ. އަދި ޕަބްލިކް ހެލްތު، އެޕިޑެމިއޮލޮޖީ، ނުވަތަ ހެލްތު ޕޮލިސީ ފަދަ ދާއިރާތަކުން ތައުލީމާއި ތަޖުރިބާ ލިބިފައިވާ ފަރާތްތަކަށް އިސްކަންދެވޭނެ ކަމަށްވެސް އިއުލާނުގައިވެ އެވެ.

މި މަގާމަށް ޝައުގުވެރިވާ ފަރާތްތަކުން އެޕްލިކޭޝަން ހުށަހެޅުމުގެ އެންމެ ފަހު މުއްދަތަކީ 11 ފެބުރުވަރީ 2026 ވާ ބުދަ ދުވަހުގެ މެންދުރުފަހު 14:00 އެވެ. އެޕްލިކޭޝަން ހުށަހަޅަންޖެހެނީ ސިވިލް ސާވިސް ކޮމިޝަންގެ އީމެއިލް އެޑްރެސް admin@csc.gov.mv އަށެވެ.

މި މަގާމަށް ކުރިމަތިލުމަށް ހުޅުވާލީ ކުރިން އެ މަގާމުގައި ހުންނެވި މައިމޫނާ އަބޫބަކުރު މަގާމުން ރިޓަޔާކުރެއްވުމާ ގުޅިގެން ނެވެ. އޭނާ ވަނީ ރާއްޖޭގެ ސިއްހީ ދާއިރާއަށް ނުހަނު ގިނަ ހިދުމަތްތަކެއް ކުރައްވައިފަ އެވެ. ވަކިން ހާއްސަކޮށް، ކޮވިޑް-19 ގެ ބަލިމަޑުކަމުގެ ތެރޭގައި ރާއްޖެއިން އެޅި ހަރުދަނާ ފިޔަވަޅުތަކުގެ އެންމެ އިސް މޭސްތިރިއަކީ އޭނާ އެވެ.