ރާއްޖޭގެ 52 ދަނޑުވެރިން، މޯލްޑިވްސް އެގްރިބިޒްނަސް ޕްރޮގްރާމް (މެޕް) ގެ ދަށުން އެޑްވާންސްޑް ހޯޓިކަލްޗަރު އެކްސްޕޯޝަރު ޓްރެއިނިން އެއްގައި ސްރީ ލަންކާއަށް ފުރައިފި އެވެ.

މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ އާއި އިންޓަނޭޝަނަލް ފަންޑް ފޯ އެގްރިކަލްޗަރަލް ޑިވެލޮޕްމަންޓް (އިފާޑް) ގުޅިގެން ކުރިއަށްގެންދާ މި ޕްރޮގްރާމް ކުރިޔަށްދާނީ،  ފެބްރުއަރީ 3 އިން 13 އަށެވެ. މި ޕްރޮގްރާމްގައި، އެންމެ ޒަމާނީ ގްރީން ހައުސް ދަނޑުވެރިކަމުގެ އުކުޅުތަކާއި، އެކަމާ ގުޅޭ ފަންނީ މައުލޫމާތު ދިނުމުގެ އިތުރުން އަމަލީ ތަޖުރިބާ ހޯދުމުގެ ފުރުސަތު ބައިވެރިންނަށް ލިބިގެންދާނެ އެވެ.

މި ދަތުރުގައި ބައިވެރިވަނީ މެޕް ޕްރޮޖެކްޓުން ހިންގި "ލީޑް ފާމާ" ނުވަތަ އިސް ދަނޑުވެރިންގެ ތަމްރީނު ފުރިހަމަކޮށްފައިވާ ފަރާތްތަކާއި، "ދަނޑުވެރި މަންފާ" ގްރާންޓްގެ އެހީގައި އަމިއްލަ ގްރީން ހައުސް ގާއިމުކޮށް އަމަލީ ގޮތުން ދަނޑުވެރިކަން ކުރަމުންދާ ފަރާތްތަކެވެ.

މެޕް ޕްރޮޖެކްޓްގެ ދަށުން ދަނޑުވެރިންގެ ހުނަރު ތަރައްގީކުރުމަށް ގިނަ މަސައްކަތްތަކެއް ދަނީ ކުރެވެމުންނެވެ. އެގޮތުން، ރާއްޖޭގެ 12 ރަށެއްގައި ގްރީން ހައުސްތައް ގާއިމުކޮށް، މޫސުމަށް އަންނަ ބަދަލުތަކަށް ކެތްކުރަނިވި "ކްލައިމެޓް ސްމާޓް" ދަނޑުވެރިކަން މިހާރު ވަނީ ތައާރަފުކުރެވިފަ އެވެ. މީގެއިތުރުން، ދަނޑުވެރިކަމުގެ ރަނގަޅު އާދަތަކާއި މިންގަނޑުތަކަށް ދަނޑުވެރިން އަހުލުވެރިކުރުވައި، ދަނޑުވެރިންގެ މެދުގައި އޮންނަ ގުޅުން ބަދަހިކުރުމަށް ގިނަގުނަ ހަރަކާތްތަކެއް އެ ވުޒާރާއިން ދަނީ ހިންގަމުންނެވެ.