މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުން އައްސޭރި ޖަލުގައި ހުކުމް ތަންފީޒު ކުރަމުންދިޔަ ގައިދީއަކު، އައިޖީއެމްއެޗްގައި ފަރުވާ ދެމުން ދަނިކޮށް މިއަދު މަރުވެއްޖެ އެވެ.
ކަރެކްޝަނުން ބުނީ ފަރުވާ ދެމުންދަނިކޮށް މަރުވީ ސ. ހިތަދޫ / ފެއަރީޕެލަސް، އަހްމަދު ޝަފީގް ކަމަށެވެ. ނޭވާލުމަށް ދަތިތަކެއް ކުރިމަތިވުމާ ގުޅިގެން އެޑްމިޓުކުރި ޝަފީގު މަރުވީ ފަރުވާދެމުންދާތާ އެއް މަސް ދުވަސް ވެފައިވަނިކޮށެވެ.
އޭނާ މަރުވީ ކަރެކްޝަނުން ބުނިގޮތުގައި، އޮކްސިޖަން ލެވެލް ކުއްލިއަކަށް ދަށްވެ، ހާލަތު އިތުރަށް ގޯސްވުމާ ގުޅިގެން އަވަސް ފަރުވާ ދެމުން ދަނިކޮށް މިއަދުގެ މެންދުރުގެ ވަގުތެއްގަ އެވެ.
މި ހާދިސާއާ ގުޅިގެން ކަރެކްޝަނަލް ސާވިސްއިން ވަނީ ކަނޑައެޅިފައިވާ އިޖުރާއަތްތަކުގެ މަތިން، އެކަން ވަގުތުން މޯލްޑިވްސް ޕޮލިސް ސާވިސްއަށާއި، ނިޔާވި މީހާގެ އާއިލާއަށާއި، އިންސްޕެކްޓާ އޮފް ކަރެކްޝަނަލް ސާވިސްގެ އިތުރުން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އަށާއި ނެޝަނަލް އިންޓެގްރިޓީ ކޮމިޝަން (އެންއައިސީ) އަށް ރަސްމީކޮށް އަންގާފަ އެވެ.
