މިދިޔަ ޖެނުއަރީ މަހު ރާއްޖޭއަށް ރެކޯޑް އަދަދަކަށް ފަތުރުވެރިން ޒިޔާރާތްކޮށްފި އެވެ.
މިއީ ރާއްޖޭގެ ފަތުރުވެރިކަމުގެ ތާރީހުގައި އެއް މަސްދުވަހުގެ ތެރޭގައި އެންމެ ގިނަ ފަތުރުވެރިން ޒިޔާރަތްކުރި މަހުގެ ގޮތުގައި ރެކޯޑެއް ގާއިމުކުރެވެނު މަހެކެވެ. އެގޮތުން ނިމިދިޔަ މަހު ރާއްޖެއަށް ވަނީ ޖުމްލަ 224,788 ފަތުރުވެރިން ޒިޔާރަތްކޮށްފަ އެވެ. މިއީ މީގެ ކުރިން އެންމެ ގިނަ ފަތުރުވެރިން ޒިޔާރަތްކުރި މަސް ކަމަށްވާ 2025 ވަނަ އަހަރުގެ ޑިސެމްބަރު މަހުގެ ރެކޯޑަށްވުރެ އިތުރު އަދަދެކެވެ. މިދިޔަ އަހަރުގެ ޑިސެމްބަރު މަހު ރާއްޖެއަށް ޒިޔާރަތް ކޮށްފައިވަނީ 224,455 ފަތުރުވެރިންނެވެ.
ޓޫރިޒަމް މިނިސްޓަރު ތޯރިގް އިބްރާހީމް މިކަމާ ބެހޭގޮތުން އެކްސްގައި ކުރެއްވި ޕޯސްޓެއްގައި ވިދާޅުވީ، މި އާ ރެކޯޑަކީ މިއަހަރުގެ ފަތުރުވެރިކަމުގެ ސިނާއަތަށް ލިބުނު ވަރަށް އުންމީދީ އަދި ފާގަތި ފެށުމެއްކަމަށެވެ. މިނިސްޓަރު ވިދާޅުވީީ، މިއީ މި ދާއިރާގައި މަސައްކަތްކުރާ ހުރިހާ ފަރާތްތަކެއްގެ ބައިވެރިވުމާއި ގުޅިފައިވާ މަސައްކަތުން ހާސިލުކުރެވުނު ބޮޑު ކާމިޔާބީއެއް ކަމަށެވެ.
މީގެއިތުރުން، މި ކުރިއެރުމަކީ ރާއްޖޭގެ ފަތުރުވެރިކަން އާ އުސްމިންތަކަކަށް ގެންގޮސް، އޭގެ މަންފާ ދިވެހި އެންމެހާ ރައްޔިތުންނަށް ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ހަރުދަނާ ތަސައްވުރާއި، މި ސިނާއަތަށް އެމަނިކުފާނު ދެއްވާ އިސްކަން ރަމްޒުކޮށްދޭ ހެއްކެއްކަމަށްވެސް މިނިސްޓަރު ފާހަގަކުރެއްވި އެވެ.
މިދިޔަ މަހު އެންމެ ގިނައިން ފަތުރުވެރިން ޒިޔާރަތްކުރީ ތިން ގައުމަކުންނެވެ. އެއީ ރަޝިޔާއިން 29،171 އިޓަލީން 23،171 އަދި ޗައިނާއިން 22،676 ފަތުރުވެރިންނެވެ.
