މާލެ ސަރަހައްދުގެ ގޭބިސީތަކަށް ރޯދަ ހަދިޔާގެ ގޮތުގައި މިހާތަނަށް 26،000 އަށްވުރެ ގިނަ މަސްދަޅު ކޭސް ދޫކޮށްފައިވާ ކަމަށް ސިޓީސް، ފީލްޑް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.

ސަރުކާރުން ރޯދަ ހަދިޔާގެ ގޮތުގައި މަސްދަޅު ކޭސް ބަހާތާ މީ ދެވަނަ އަހަރެވެ. މި އަހަރުގެ ހަދިޔާ ބެހުމުގެ މަސައްކަތް ފަށާފައިވަނީ މިދިޔަ ހޮނިހިރު ދުވަހުގެ ރޭގަ އެވެ. މިނިސްޓަރު އާދަމް ޝަރީފް 'އެކްސް' ގައި ކުރެއްވި ޕޯސްޓެއްގައި ވިދާޅުވި ގޮތުގައި، މުޅި ރާއްޖޭގައި ރޯދަ ހަދިޔާ ބެހުމުގެ އިންތިޒާމުތައް ކުރިއަށްދާއިރު، ރޭގެ ނިޔަލަށް މާލެ ސަރަހައްދުން އެކަނިވެސް 26،739 މަސްދަޅު ކޭސް ވަނީ ހަވާލުކުރެވިފަ އެވެ.

މީގެއިތުރުން، މި މަހުގެ 11 ވަނަ ދުވަހާ ހަމައަށް މާލޭގައި މިހާރުވެސް ކަނޑައަޅާފައިވާ މަރުކަޒުތަކުން ހަދިޔާ ދޫކުރަމުންދާނެ ކަމަށް މިނިސްޓަރު ފާހަގަކުރެއްވި އެވެ. އަތޮޅުތަކުގެ ރަށްތަކަށް ބޭނުންވާ މަސްދަޅު ކޭސްތައް ފޮނުވުމުގެ މަސައްކަތް މިހާރު ފަށާފައިވާއިރު، ރަށްރަށުގައި ހަދިޔާ ބެހުމުގެ ކަންކަން ކުރިއަށްދާނީ އެ ރަށެއްގެ ކައުންސިލްގެ ބެލުމުގެ ދަށުންނެވެ.

މި އަހަރު ރޯދަ ހަދިޔާ ދިނުމަށް އެކުލަވައިލި ލިސްޓަށް ބަލާއިރު، ރާއްޖޭގެ ރަށްތަކާއި ސިޓީތަކުގައި ހިމެނޭ ގޭބިސީތަކުގެ ޖުމުލަ އަދަދަކީ 56،918 އެވެ. އަދި ޑޮމެސްޓިކް މީޓަރުގެ އަދަދަކީ 61،755 އެވެ. ސަރުކާރުގެ އަމާޒަކީ މި އަހަރުގެ ރޯދަ ހަދިޔާގެ ގޮތުގައި ޖުމުލަ 118،673 މަސްދަޅު ކޭސް ރައްޔިތުންނަށް ފޯރުކޮށްދިނުމެވެ.