ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީ އިންތިހާބަށް ވާދަކުރުމަށް ހުށަހެޅި ފޯމުތަކުގެ ތެރެއިން، މިހާތަނަށް 2،900 އަށްވުރެ ގިނަ ކެންޑިޑޭޓުންގެ ފޯމު ބަލައިގަނެފައިވާ ކަމަށް އިލެކްޝަންސް ކޮމިޝަން (އީސީ)އިން ހާމަކޮށްފި އެވެ.

ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށް ކުރިމަތިލުމުގެ ފުރުސަތު އިލެކްޝަންސް ކޮމިޝަނުން ހުޅުވާލީ މިދިޔަ ޖެނުއަރީ މަހުގެ 17 ވަނަ ދުވަހު އެވެ. މި އިންތިހާބުތަކުގައި ވާދަކުރުމަށް ފޯމު ހުށަހެޅުމުގެ އެންމެ ފަހު ވަގުތަކީ މިއަދު ހަވީރު 17:00 އެވެ. އިލެކްޝަންސް ކޮމިޝަނުން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، ރޭގެ 20:00 އާ ހަމައަށް ކައުންސިލް އިންތިހާބުގައި ވާދަކުރުމަށް ޖުމްލަ 2،220 ފޯމު ހުށަހަޅާފައިވެ އެވެ.

މީގެތެރެއިން 1،596 ފޯމަކީ ޝަރުތު ހަމަވާ ފޯމުތަކެވެ. އަދި ޝަރުތު ހަމަނުވުމުގެ ސަބަބުން 318 ފޯމެއް ބަލައިނުގަންނަން ނިންމާފައިވާއިރު، އޭގެ ތެރެއިން 306 ފޯމެއް އިސްލާހުކުރުމަށްފަހު އަލުން ހުށަހަޅާފައިވެ އެވެ. ކައުންސިލް އިންތިހާބަށް ހުށަހެޅި ފޯމުތަކުގެ ތެރެއިން 1،216 ފޯމަކީ ސިޔާސީ ޕާޓީތަކުގެ ފަރާތުން ހުށަހަޅާފައިވާ ފޯމުތަކެވެ. އަދި އަމިއްލަ ގޮތުން ވާދަކުރުމަށް 380 ފޯމު ހުށަހަޅާފައިވެ އެވެ. ޝަރުތު ހަމަނުވުމުގެ ސަބަބުން ބޭރުކޮށްލި ފޯމުތަކުގެ ތެރޭގައި ސިޔާސީ ޕާޓީތަކުން ހުށަހެޅި 169 ފޯމަކާއި، އަމިއްލަ ގޮތުން ހުށަހެޅި 149 ފޯމެއް ހިމެނެ އެވެ.

އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށް ބަލާއިރު، މިހާތަނަށް ޖުމްލަ 1،365 ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަނުން މައުލޫމާތު ދެއެވެ. މީގެތެރޭގައި ސިޔާސީ ޕާޓީތަކުން ހުށަހެޅި 1،106 ފޯމާއި، އަމިއްލަ ގޮތުން ކުރިމަތިލީ 259 ކެންޑިޑޭޓުންގެ ފޯމު ހިމެނެ އެވެ. މީގެ އިތުރުން، ފުރަތަމަ ހުށަހެޅި އިރު ކެންޑިޑަސީ ގަބޫލުނުކުރުމުން، އިސްލާހުތަކާއެކު އަލުން 205 ފޯމެއް ވަނީ ހުށަހަޅާފަ އެވެ.