ނިމިދިޔަ ޖެނުއަރީ މަހުގެ ތެރޭގައި އެންމެ ގިނައިން ރިޕޯޓުކޮށްފައިވަނީ ވައްކަމުގެ މައްސަލަތަކާއި މަގުމަތީގެ އެކްސިޑެންޓުތައްކަމަށް ފުލުހުންގެ ތަފާސްހިސާބުތަކުން ދައްކައިފި އެވެ.
މި ތަފާސްހިސާބުތަކަށް ބަލާއިރު، މިދިޔަ މަހުގެ ތެރޭގައި ފުލުހުންނަށް ޖުމްލަ 1،024 މައްސަލަ ހުށަހަޅާފައިވެ އެވެ. މީގެތެރެއިން އެންމެ ގިނައިން ހުށަހަޅާފައިވަނީ އެކްސިޑެންޓްތަކުގެ މައްސަލަތަކެވެ. އެގޮތުން، 229 ޓްރެފިކް އެކްސިޑެންޓު ރިޕޯޓްކޮށްފައިވާއިރު، 298 ވައްކަމުގެ މައްސަލަ ވަނީ ރިޕޯޓްކޮށްފަ އެވެ. އެކަމަކު މިދިޔަ އަހަރުގެ ޑިސެމްބަރު މަހާ އަޅާބަލާއިރު ޖެނުއަރީ މަހު ވައްކަމާއި އެކްސިޑެންޓުގެ މައްސަލަތައް ވަނީ ދަށަށް ގޮސްފަ އެވެ.
މިދިޔަ މަހު ފުލުހުންނަށް ހުށަހަޅާފައިވާ މައްސަލަތަކުގެ ތެރޭގައި ހިމެނެނީ:
- މުދަލަށް ގެއްލުން ދިނުމުގެ 51 މައްސަލަ
- މަކަރާއި ހީލަތް ހެދުމުގެ 18 މައްސަލަ
- ޖިންސީ ގޯނާގެ 11 މައްސަލަ
- އަނިޔާ ކުރުމުގެ 52 މައްސަލަ
- ގެވެށި އަނިޔާ 35 މައްސަލަ
- ފޭރުމުގެ 13 މައްސަލަ
- ފޯޖް ކުރުމުގެ 8 މައްސަލަ
- މަސްތުވާތަކެއްޗާ ގުޅޭ 156 މައްސަލަ
- އެއްޗެހި ގެއްލުމުގެ 107 މައްސަލަ
ކޮންމެ މަހަކު ވެސް ފުލުހުން ތަފާސްހިސާބުތައް ނެރޭއިރު ގިނައީ ވައްކަމުގެ މައްސަލަތަކެވެ. ދެވަނައަށް އެންމެ ގިނައީ އެކްސިޑެންޓުގެ މައްސަލަތަކެވެ. އަދި މަސްތުވާތަކެތީގެ މައްސަލަތައް ވެސް ގިނަ އެވެ.
