ރޭ ދަންވަރު ހުޅުމާލޭގައި ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު 21 މީހަކަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ހަމަޖައްސައިދީފި އެވެ.

ރޭ 03:30 ހާއިރު އެމްއެންޑީއެފްގެ ފަޔާ ސްޓޭޝަނަށް ވަނީ، ހުޅުމާލޭ ފުރަތަމަ ފިޔަވަހީގެ ޗަނބޭލީމަގު، ލޮޓް ނަންބަރު 11154 ގޭގެ ތިރީގައި ހުރި ގުދަނެއްގައި ރޯވެގެން އުޅޭކަމުގެ މައުލޫމާތު ލިބިގެން ހަރަކާތްތެރިވެފަ އެވެ. އަދި ފަޔާ ފައިޓަރުން ވަނީ އެ ސަރަހައްދަށް ގޮސް، އަލިފާން ނިއްވުމުގެ މަސައްކަތް ކޮށްފަ އެވެ. އެގޮތުން، ފަޔާ ފައިޓަރުން ކުރި މަސައްކަތުން އަލިފާން ނިއްވާލެވުނީ 03:40 ހާއިރެވެ.

އެންޑީއެމްއޭއިން މައުލޫމާތު ދިން ގޮތުގައި، 6 ފަންގިފިލާގެ އެ އިމާރާތުގެ ތިރީގައި ހުރި ގުދަނުގައި ހިނގި މި ހާދިސާގައި، އިމާރާތުގެ މައި ކަރަންޓް ޕެނަލަށް ގެއްލުންވެ މުޅި އިމާރާތުން ވަނީ ކަރަންޓު ކެނޑިފަ އެވެ. މިކަމާ ގުޅިގެން، އެ އިމާރާތުގެ ދެ އެޕާޓްމަންޓެއްގައި ދިރިއުޅޭ 21 މީހަކަށް ބޭނުންވާ ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމުތައް އެ އޮތޯރިޓީން މިހާރު ވަނީ ފޯރުކޮށްދީފަ އެވެ.

މި ހާދިސާ ހިނގަން މެދުވެރިވި ގޮތާ ބެހޭގޮތުން އެމްއެންޑީއެފުން ބުނީ، އަލިފާން ފުރަތަމަ ރޯވީ ގުދަނުގެ ބޭރުގައި ހުރި ކުނިތަކެއްގައި ކަމަށެވެ. އެތަނުގައި ރޯވި އަލިފާނުގެ ސަބަބުން ގުދަނުގެ ބިއްލޫގަނޑު ތަޅައިގެންގޮސް، ގުދަނުގެ އެތެރެއަށް އަލިފާން ފެތުރުނީ އެވެ.