ހިޔާ ޓަވަރެއްގައި ރޭ ހިނގި އަލިފާނުގެ ހާދިސާއާ ގުޅިގެން 85 މީހަކަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފި އެވެ.

ހުޅުމާލޭ ފޭސް 2 ގައި ހުންނަ ހިޔާގެ 5 ވަނަ ޓަވަރުގައި އަލިފާން ރޯވީ ރޭ 7:00 ހާއިރެވެ. މި ހާދިސާގައި އެއްވެސް މީހަކަށް އަނިޔާ ލިބިފައެއް ނުވެ އެވެ. އެކަމަކު ނަރުދަމާއާއި އެހެނިހެން ހިދުމަތްތަކަށް ބުރުއެރުމުގެ ސަބަބުން ބައެއް އެޕާޓްމެންޓުތަކުގެ މީހުންނަށް ކަމާ ގުޅޭ އިދާރާތަކުން ދަނީ އެހީތެރިކަން ފޯރުކޮށްދެމުން ނެވެ.

ޑިޒާސްޓާ މެނޭޖްމެންޓުން ބުނީ، އެ އަލިފާނުގެ ހާދިސާ އާ ގުޅިގެން 18 އެޕާޓްމަންޓްގައި ދިރިއުޅޭ 85 ފަރާތަކަށް ބޯހިޔާވަހިކަން ހަމަޖައްސައިދީ ކެއުން ބުއިމަށް އެހީތެރިކަން ފޯރުކޮށްދީފައިވާ ކަމަށެވެ. އަދި އަލިފާނުގެ ހާދިސާ ހިނގި ޓަވަރުގެ 38 އެޕާޓްމަންޓުގެ ނަރުދަމާ ހޮޅިތަކަށް ގެއްލުންވެފައިވާއިރު، އެ ގެއްލުންތައް މަރާމާތުކުރުމުގެ މަސައްކަތް އެޗްޑީސީން ކުރަމުންދާ ކަމަށް ވެސް ބުންޏެވެ.

އެންޑީއެމްއޭއިން ވަނީ އެ ހާދިސާއާ ގުޅިގެން އެއްވެސް އެހީތެރިކަމެއް ބޭނުންވާ ނަމަ އެ އޮތޯރިޓީގެ އެމެޖެންސީ ހޮޓްލައިން 115 އަށް ގުޅަން އިލްތިމާސްކޮށްފަ އެވެ.