"މޯލްޑިވްސް މެރިޓައިމް ކޮންފަރެންސް" ގެ ކޮންފަރެންސް ޕާޓްނަރުންނާއެކު މޯލްޑިވްސް ޕޯޓްސް ލިމިޓެޑް (އެމްޕީއެލް)އިން  އެއްބަސްވުމެއްގައި ސޮއިކޮށްފި އެވެ.

އެމްޕީއެލްގެ ހެޑް އޮފީހުގައި ބޭއްވި ރަސްމިއްޔާތެއްގައި "މޯލްޑިވްސް މެރިޓައިމް ކޮންފަރެންސް"ގެ ހަތަރު ޕާޓްނަރުންނާއެކު ވަނީ އެއްބަސްވުމުގައި ސޮއިކޮށްފަ އެވެ. މި ރަސްމިއްޔާތުގައި އެމްޕީއެލްގެ ފަރާތުން އެއްބަސްވުންތަކުގައި ސޮއިކުރެއްވީ ކުންފުނީގެ ސީއީއޯ ޑީސީޕީ (ރިޓަޔާޑް) މުހައްމަދު ރިޝްވާނެވެ.

އެއީ:

• ލޮޖިސްޓިކްސް ޕާޓްނާ – މޯލްޑިވްސް ސްޓޭޓް ޝިޕިން (އެމްއެސްއެސް)
• ބްރޯޑްކާސްޓިންގ ޕާޓްނާ – ޕަބްލިކް ސަރވިސް މީޑިއާ (ޕީއެސްއެމް)
• ހޯސްޓިންގ ޕާޓްނާ – ވިލާ ޝިޕިން އެންޑް ޓްރޭޑިން ކޮމްޕެނީ
• މެގަޒިން ޕާޓްނާ – މޯލްޑިވްސް މެރިޓައިމް ޖާނަލް (އެމްއެމްޖޭ)

މީގެއިތުރުން، މި ކޮންފަރެންސްގެ ޕާޓްނަރުންގެ ގޮތުގައި މޯލްޑިވްސް ކޯސްޓް ގާޑް، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން، ޔުނައިޓަޑް ނޭޝަންސް ކޮންފަރެންސް އޮން ޓްރޭޑް އެންޑް ޑިވަލޮޕްމަންޓް (އަންކްޓަޑް) ހިމެނެ އެވެ. އަދި އިންޓަނޭޝަނަލް އެސޯސިއޭޝަން އޮފް ޕޯޓްސް އެންޑް ހާބާސް، ސެކިއުރިޓީ އެންޑް ސޭފްޓީ ޕާޓްނަރުގެ ގޮތުގައި މޯލްޑިވްސް ޕޮލިސް ސާވިސަސް އަދި އެކެޑަމިކް ޕާޓްނަރުގެ ގޮތުގައި މޯލްޑިވްސް ނޭޝަނަލް ޔުނިވާސިޓީ ވަނީ މީގެ ކުރިން ހަމަޖައްސައިފަ އެވެ.

މޯލްޑިވްސް މެރިޓައިމް ކޮންފަރެންސްގެ ދެވަނަ އެޑިޝަންގެ މައިގަނޑު ތީމަކީ “ސެކިއުރިޓީ، ސޭފްޓީ އެންޑް ސަސްޓޭނަބިލިޓީ” އެވެ. މި ކޮންފަރެންސްގެ ދެވަނަ އެޑިޝަން ބޭއްވުމަށް ހަމަޖެހިފައިވަނީ މި އަންނަ އޭޕްރީލް މަހުގެ 15 ވަނަ ދުވަހު އެވެ. މި ފަހަރުގެ ކޮންފަރެންސްގައިވެސް މެރިޓައިމް ދާއިރާއިން ބައިނަލްއަގުވާމީ ގޮތުން ފާހަގަކުރެވޭ ތަޖުރިބާކާރުންނާއި ރާއްޖޭގެ ތަޖުރިބާކާރުން ސްޕީކަަރުންގެ ގޮތުގައި ބައިވެރިވާނެ އެވެ.