ބިދޭސީން މަސައްކަތްކުރާ ވޯކް ސައިޓުތަކުގެ ތެރެއިން ޕްރޮޖެކްޓުގެ މުއްދަތު ހަމަވެފައިވާ ތަންތަން އަލުން ރަޖިސްޓްރީކުރަން ހުށަހަޅާ ވޯކް ސައިޓު ޑިކްލަރޭޝަން ފޯމު ހުށަހެޅުމަށް ދިން މުއްދަތު އިތުރުކޮށްދީފި އެވެ.
މި ލިޔެކިއުންތައް ހުށަހެޅުމުގެ މުއްދަތު އަންނަ ޖޫންމަހުގެ އެއް ވަނަ ދުވަހާ ހަމައަށް އިތުރުކޮށްދީފަ އެވެ. ހޯމް މިނިސްޓްރީން ނެރުނު ބަޔާނެއްގައި ބުނީ، މުއްދަތު އިތުރުކުރަން ނިންމީ ސައިޓް ރަޖިސްޓްރީ ކުރުމަށް މިހާރު ހުށަހަޅަންޖެހޭ ލިޔެކިޔުންތަކުގެ އިތުރުން ނޯޓަރައިޒް ކޮށްފައިވާ "ވޯކް ސައިޓް ޑިކްލަރޭޝަން ފޯމު" އަދި އިގްރާރު ހުށަހެޅުމަށް ދީފައިވާ މުއްދަތު އިތުރުކޮށްދިނުމަށް އެދި ގިނަ ފަރާތްތަކުން އެދެމުންދާތީ ކަމަށެވެ.
އެހެންކަމުން ޖޫން މަހުގެ ފުރަތަމަ ދުވަހުގެ ކުރިން ވޯކް ސައިޓް ޑިކްލަރޭޝަން ފޯމު ރަޖިސްޓަރީކޮށްފައިވާ ސައިޓުގެ "ޑޮކިއުމަންޓް އަޕްޑޭޓް ރިކުއެސްޓް" ނުވަތަ "ސައިޓް ޕާމިޓް އަޕްޑޭޓް" މެދުވެރިކޮށް ހުށަހެޅުމަށް މިނިސްޓްރީއިން ވަނީ ހުރިހާ ވަޒީފާދޭ ފަރާތްތަކަށް އަންގާފަ އެވެ. އަދި ކަނޑައެޅިފައިވާ މުއްދަތުގެ ތެރޭގައި ފޯމު ހުށަނާޅާ ފަރާތްތަކުގެ ސައިޓްތައް ސަސްޕެންޑް ކުރެވޭނެކަން ވެސް މިނިސްޓްރީއިން ބުންޏެވެ.
މި ސަރުކާރުން ދަނީ ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިހާރު ކުރިޔަށް ދާ އޮޕަރޭޝަން ކުރަނގީގެ މައިގަނޑު މަގްސަދަކީ ދިވެހިރާއްޖޭގައި ދިރިއުޅޭ އެންމެހާ ބިދޭސީންގެ ބައޯމެޓްރިކް މައުލޫމާތު އެއްކޮށް، އެއް ޑޭޓާބޭސްއަކަށް ޖަމާކުރުމެވެ. މީގެ ސަބަބުން، ނުގަވާއިދުން ދިރިއުޅޭ ބިދޭސީންގެ މައްސަލަ ހައްލުކުރުމަށް ފަސޭހަވެ، ލޯކަލް ކައުންސިލްތަކަށް މި މައުލޫމާތު ލިބޭނެ އިންތިޒާމު ހަމަޖެހިގެންދާނެ އެވެ.
