މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިސްނަގައިގެން، މޯލްޑިވްސް ބްލަޑް ސާވިސް (އެމްބީއެސް) އާ ގުޅިގެން ލޭ ހަދިޔާކުރުމަށް ކޭމްޕެއް ނިންމައިފި އެވެ.
އެމްއޭސީއެލްއިން ބުނި ގޮތުގައި، އެއާޕޯޓުގެ ރެކްރިއޭޝަން ސެންޓަރު (އޭއާރުސީ)ގައި ޕްރޮގްރާމް ކުރިއަށް ގެންދަން ނިންމާފައި ވަނީ އަންނަ ހޮނިހިރު ދުވަހާއި އާދިއްތަ ދުވަހުގަ އެވެ.
މިއީ ކޮންމެ އަހަރަކުވެސް އެމްއޭސީއެލްގެ މުވައްޒަފުންނަށް އަމާޒުކޮށްގެން ބާއްވަމުން އަންނަ ޕްރޮގްރާމެކެވެ. އެހެންނަމަވެސް، އެހެން އަހަރުތަކާ ހިލާފަށް މިއަހަރުގެ ޕްރޮގްރާމް ވަނީ ވަރަށް ބޮޑަށް ފުޅާކޮށްފަ އެވެ.
އެގޮތުން، އެމްއޭސީއެލްގެ މުވައްޒަފުންގެ އިތުރުން އެއާޕޯޓުގައި މަސައްކަތްކުރާ ދައުލަތުގެ އެކި އިދާރާތަކާއި، މުއައްސަސާތަކާއި، އެއާޕޯޓުގައި ހަރަކާތްތެރިވާ ކުންފުނިތަކުގެ އިތުރުން ރިސޯޓް މުވައްޒަފުންނަށް ވެސް ލޭ ހަދިޔާކުރުމުގެ ފުރުސަތު ވަނީ ހުޅުވާލާފަ އެވެ.
އެމްއޭސީއެލް ބުނި ގޮތުގައި، މިގޮތަށް ކޭމްޕް ބޭއްވުމުގެ މަގުސަދަކީ ލޭ ލިބުން ދަތިވެ، އެމްބީއެސް އިން އާންމުންގެ އެހީތެރިކަމަށް އެދިފައިވާތީ އާއި ކޮންމެ އަހަރެއްގެ ވެސް ރޯދަ މަހު ލޭ ލިބުން ދަތިވާތީ އެކަމަށް އެހީތެރިވުމަށް ކަމަށް ވެސް އެ ކުންފުނިން ބުންޏެވެ. މި ޕްރޮގްރާމްގައި ބައިވެރިވެ ލޭ ހަދިޔާކުރަން ބޭނުންވާ ފަރާތްތަކުން މި ލިންކު މެދުވެރިކޮށް ރަޖިސްޓްރީ ކުރެވޭނެ ކަމަށް އެމްއޭސީއެލް އިން ބުންޏެވެ.
