ޓެކްސީ ގަވާއިދަށް މުހިއްމު އިސްލާހުތަކެއް ގެނެސް، ޓެކްސީ ސެންޓަރުތައް ރަޖިސްޓްރީ ކުރުމުގައި ބޮޑެތި ލުއިތަކެއް ދީފި އެވެ.
ޓްރާންސްޕޯޓް މިނިސްޓްރީއިން ބުނީ މި ބަދަލުތަކަކީ އެއްގަމު ދަތުރުފަތުރުގެ ނިޒާމު ހަރުދަނާކޮށް ހިދުމަތް ދޭ ފަރާތްތަކަށާއި ޑްރައިވަރުންނަށް ލުއި ފަސޭހަ ގޮތްތަކެއް ހޯދައިދިނުމަށް ގެނެވުނު ބަދަލުތަކެއް ކަމަށެވެ.
މީގެ ކުރިން ޓެކްސީ ސެންޓަރެއްގެ ގޮތުގައި ރަޖިސްޓްރީ ކުރެވޭނީ މަދުވެގެން 100 ޑްރައިވަރުން ހަމަވެގެންނެވެ. އެކަމަކު އަލަށް ނެރުނު ގަވާއިދުގައިވާގޮތުން 50 ޑްރައިވަރުން ހަމަވާ ނަމަ ޓެކްސީ ސެންޓަރެއްގެ ގޮތުގައި ރަޖިސްޓަރ ކުރެވޭނެ އެވެ. މީގެ ސަބަބުން އައު ސެންޓަރުތައް އުފެދުމަށް ހުރި ހުރަސްތައް ނެތިގޮސް، ގިނަ ބަޔަކަށް މި ދާއިރާއަށް ވަނުމުގެ ފުރުސަތު ހުޅުވިގެންދާނެ ކަމަށް މިނިސްޓްރީން ވަނީ ބުނެފަ އެވެ.
މީގެއިތުރުން، ޕޯޓަލް ނުވަތަ އޮންލައިން މޯބައިލް އެޕްލިކޭޝަންތައް ބޭނުންކޮށްގެން ހިދުމަތްދޭނަމަ މިނިސްޓްރީގެ ހާއްސަ ހުއްދައެއް ހޯދަން ޖެހޭނަކަމަށް ވެސް އުސޫލުގައި ހިމަނާފައިވެ އެވެ. މި ގެނެވުނު ބަދަލުގެ ސަބަބުން ޑްރައިވަރުންނަށް ލިބޭ އާމްދަނީ އިތުރު ކުރުމަށް މަގުފަހި ވެގެންދާނެ ކަމަށް މިނިސްޓްރީން ވަނީ ބުނެފައެވެ. އަދި ހިދުމަތަށް އެންމެ ބާރުބޮޑުވާ ވަގުތަކުގައި ޑިމާންޑާ އެއްވަރަށް ހިދުމަތް ފޯރުކޮށްދިނުމަށް ސެންޓަރުތަކަށް އިތުރު ފަސޭހައަކަށް ވެގެންދާނެއެވެ.
