ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީ އިންތިހާބަށް ކުރިމަތިލުމަށް ފޯމު ހުށަހެޅޭ ވަގުތު އިލެކްޝަންސް ކޮމިޝަނުން މިއަދު އިތުރުކޮށްފި އެވެ.

ސަރުކާރުގެ ގެޒެޓުގައި އީސީން މިއަދު އާއްމުކުރި އިއުލާނުގައި ވަނީ އިންތިހާބަށް ކުރިމަތިލުމަށް އެދޭ ފަރާތްތަކުގެ ފޯމު އޮންލައިންކޮށް ހުށަހެޅޭ ވަގުތު އިތުރުކޮށްފަ އެވެ. އެގޮތުން މިއަދުން ފެށިގެން އަންނަ މަހުގެ އާދިއްތަ ދުވަހުގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 05:30 އަށް އަދި ހުކުރު ދުވަހު މެންދުރުފަހު 03:30 އިން ރޭގަނޑު 08:00 އަށް އިތުރުކޮށްފައިވާ ކަމަށެވެ.

މިއަދާ ހަމައަށް އީސީއަށް ފޯމު ހުށަހެޅެނީ ހުކުރު ދުވަސް ފިޔަވައި އެހެން ހުރިހާ ދުވަހެއްގެ ހެނދުނު 8:30 އިން މެންދުރުފަހު 3:30 އަށެވެ. އަދި ހުކުރު ދުވަހު ފޯމު ހުށަހެޅެނީ މެންދުރުފަހު 3:30 އިން 5:30 އަށެވެ.

4 އޭޕްރިލް ގައި ބާއްވާ ލޯކަލް ކައުންސިލް އިންތިހާބުގައި ލޯކަލް ކައުންސިލުތަކަށް 678 މެންބަަރުން ކުރިމަތިލާނެ އެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ މަގާމަށް 678 މެންބަރުން ކުރިމަތިލާނެ އެވެ.

މި އިންތިހާބުގައި ވޯޓުލުމުގެ ހައްގު ލިބިފައިވަނީ ޖުމްލަ 249،937 މީހަކަށެވެ. އެއީ 144،527 އަންހެނުންނާއި، 150،410 ފިރިހެނުންނަށެވެ.