ވެސްޓް ބެންގަލް ސަރަހައްދުގައި ނިޕާ ވައިރަސް ފެތުރޭތީ، އެ ސަރަހައްދަށް ދަތުރުކުރާ ފަރާތްތަކުން ސަމާލުވުމަށް ހެލްތު ޕްރޮޓެކްޝަން އެޖެންސީ، (އެޗްޕީއޭ)އިން އިލްތިމާސްކޮށްފި އެވެ.

އެޗްޕީއޭއިން މިގޮތަށް އިލްތިމާސްކޮށްފައިވަނީ، ވެސްޓް ބެންގަލްއިން މި މަހުގެ ތެރޭގައި ނިޕާ ވައިރަސްގެ 3 ކޭހެއް ފެނިފައި ވާތީ އެވެ. އެޗްޕީއޭއިން ބުނި ގޮތުގައި މިވަގުތު ރާއްޖެއަށް ނިޕާ ވައިރަސްގެ ނުރައްކާ އޮތް މިންވަރު ކުޑަ ނަމަވެސް އިންޑިއާގެ ހާލަތު މޮނިޓާ ކުރަމުންދާ ކަމަށާއި ވެސްޓް ބެންގަލްއަށް ދަތުރުކުރާ ފަރާތްތަކުން އެކަމަށް ސަމާލުވުން މުހިންމު ކަމަށެވެ.

ވެސްޓް ބެންގާލް އިން ނިޕާ ވައިރަހަށް ޕޮޒިޓިވް ތިން މީހަކު ވަނީ ފެނިފައެވެ. ކޮންޓެކްޓްވި 180 އަށްވުރެ ގިނަ މީހުން ދެނެގަނެވި އެމީހުން މިހާރު ކަރަންޓީނު ކޮށްފަ އެވެ. އަދި ކަރަންޓީނު ކޮށްފައިވާ މީހުންގެ ހާލަތު އެގައުމުގެ ކަމާ ބެހޭ ފަރާތްތަކުން ވަރަށް ގާތުން ބަލަމުންދާ ކަމަށެވެ. މީގެއިތުރުން ބަލި ޖެހިގެން އިތުރު ކޭސްއެއް މިއަދާ ހަމައަށް ފެނިފައި ނުވާ އިރު، މި ކޭސްތަކާ ގުޅިގެން އިންޑިއާގެ އިތުރު އެހެން އެއްވެސް ސަރަހައްދަކުން އަދި އެހެން ގައުމަކުން މި ބަލި ފެނިފައިވާ ކަމުގެ ރިޕޯޓެއް ކޮއްފައި ނުވާ ކަމަށެވެ.

ނިޕާ ވައިރަސް އަކީ ޖަނަވާރުންގެ ޒަރިއްޔާއިން އިންސާނުންނާއި މީހުންގެ މެދުގައި ފެތުރެމުންދާ ފުރާނަޔަށް ނުރައްކާވާ ފަދަ ބައްޔެކެވެ. މެލޭޝިޔާއިން 1998 ވަނަ އަހަރު އެންމެ ފުރަތަމަ ފެނުނު މި ވައިރަސް އަކީ އޭގެ ހޯސްޓް ކަމަށްވާ ފްރޫޓް ބެޓްސް އިން ޖެހޭ ބައްޔެކެވެ. އޭގެ ފަހުން މައިގަނޑު ގޮތެއްގައި މި ބަލީގެ ކޭސްތައް ފެންނަނީ، ބަންގްލަދޭޝް އާއި އިންޑިއާގަ އެވެ.