ރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް)ގައި ތެލާއި، ގޭހާއި، މިނަރަލް އެކްސްޕްލޮރޭޝަންގެ މަސައްކަތްތަކަށް އިންވެސްޓްކުރެވޭ ގޮތަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަނޑައަޅުއްވައިފި އެވެ.
ރައީސް ނެރުއްވި ގަރާރެއްގައި ވަނީ ސްޕެޝަލް އިކޮނޮމިކް ޒޯނުގެ ގާނޫނުގެ 22 ވަނަ މާއްދާގައިވާ ގޮތުގެ މަތީން، ބޯޑް އޮފް އިންވެސްޓްމަންޓްސްގެ މަޝްވަރާއާއެކު، ކޮންމެ އަހަރެއްގެ ފެބުރުވަރީ މަހުގެ ކުރިން މި މިންގަނޑުތައް މުރާޖާކޮށްފަ އެވެ. ރައީސް ނެރުއްވި ގަރާރުގައި ވަނީ ތެލާއި ގޭހާއި މިނެރަލް އެކްސްޕްލޮރޭޝަން މަސައްކަތްތައް ވެސް އިތުރު ކުރައްވައިފަ އެވެ. މީގެކުރިން އެ ގަރާރުގައި އެސްއީޒެޑްގައި ކުރެވޭ އެ ބާވަތުގެ މަސައްކަތަކަށް ހިމަނުއްވާފައި އޮތީ ހަމަ އެކަނި ގޭހުގެ މަސައްކަތްތަކެވެ.
އެ ގަރާރުގައި އެސްއީޒެޑްގައި ހިންގިދާނެ އިގްތިސާދީ މަސައްކަތްތައް ކަމުގައި ކަނޑައަޅުއްވާފައިވަނީ، ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަނޫން އަދަދުގެ އިންވެސްޓްމަންޓްތަކާއި ޖުމުލަ 500 މިލިޔަން އެމެރިކާ ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓް ހިމެނޭގޮތަށް ތަރައްގީކުރުމަށް ހުށަހަޅާ ސަސްޓެއިނަބަލް ޓައުންޝިޕް ޑިވެލޮޕްމަންޓް މަޝްރޫއުތަކެވެ.
އެއެސްއީޒެޑްގައި ހިންގޭނެ އިތުރު މަސަތްތަކުގެ ތެރޭގައި ހިމެނެނީ:
- އެކްސްޕޯޓަށް އިސްކަންދީގެން ހިންގާ މެނުފެކްޗަރިންގެ އެކި ބާވަތުގެ މަސައްކަތްތައް
- ޓްރާންސްޝިޕްމަންޓް ޕޯޓާއި އިންޓަރނޭޝަނަލް ލޮޖިސްޓިކްސް އާއި ޕޯޓާއި އެއާޕޯޓާއި ބަލްކް ބްރޭކިން އާއި ބަންކަރިން ޑޮކިން ހިދުމަތް
- ޔުނިވަސިޓީ އާއި ޓާޝަރީ ހޮސްޕިޓަލްތަކާއި ސްޕެޝަލިޓީ ހޮސްޕިޓަލާއި ދުނިޔޭގެ ފެންވަރުގެ ރިސާޗް އެންޑް ޑިވެލޮޕްމަންޓް ފެސިލިޓީތައް.
- ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައި.ސީ.ޓީ) ޕާކްތަކާއި އައި.ސީ.ޓީއާ ގުޅޭ ފެސިލިޓީތައް.
- އިންޓަނޭޝަނަލް ފައިނޭންޝަލް ހިދުމަތްތަކާއި އިންޓަނޭޝަނަލް ޓްރޭޑް ސެންޓަރުތައް
- ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް.
- ތެލާއި ގޭހާއި މިނަރަލް އެކްސްޕްލޮރޭޝަންގެ މަސައްކަތްތައް
މީގެ ކުރިން ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި އެސްއީޒެޑް އިންވެސްޓްމެންޓަކަށް ކަނޑައެޅުއްވި އެންމެ ކުޑަ އަގަކީ 150 މިލިއަން ޑޮލަރެވެ. ނަމަވެސް 2023 ވަނަ އަހަރު ރައީސް ނެރުއްވި ގަރާރަކުން ވަނީ، އެސްއީޒެޑް އިންވެސްޓްމެންޓް ފެށޭ އަގު 100 މިލިއަން ޑޮލަރަށް ދަށްކުރައްވައިފަ އެވެ.
އެސްއީޒެޑް ގާނޫނުގެ ދަށުން ދިން ފުރަތަމަ ހުއްދަ، މި ސަރުކާރުން ދީފައިވަނީ ކަރަންޓު ފޯރުކޮށްދިނުމަށް މާލޭ ސަރަހައްދުގައި ފްލޯޓިން ސޯލާ ނިޒާމެއް ގާއިމުކުރުމަށް ކެނެޑާގެ އަބްރަކްޒަސް ޕަވާ ކޯޕް އަށެވެ. އެ ކުންފުނިން އެ ޕްރޮޖެކްޓު ހިންގަނީ ޗައިނާގެ ސަންގްރޯ ޕަވާ ސްޕްލައި ކޯ ލިމިޓެޑާ ގުޅިގެން ކަމަށް އިކޮނޮމިކް މިނިސްޓްރީން ބުނެފައިވެ އެވެ.
