ދެކުނު އޭޝިއާގައި ނުރައްކާތެރި 'ނިޕާ' ވައިރަސް ފެތުރެން ފެށުމާ ގުޅިގެން، އޭޝިއާގެ ބައެއް ގައުމުތަކުން އެއާޕޯޓުތަކުގެ ސިއްހީ ފިޔަވަޅުތައް ވަރުގަދަކުރަން ފަށައިފި އެވެ.
ނިޕާ ވައިރަސް އަކީ ޖަނަވާރުންގެ ޒަރިއްޔާއިން އިންސާނުންނާއި މީހުންގެ މެދުގައި ފެތުރެމުންދާ ފުރާނަޔަށް ނުރައްކާވާ ފަދަ ބައްޔެކެވެ. މެލޭޝިޔާއިން 1998 ވަނަ އަހަރު އެންމެ ފުރަތަމަ ފެނުނު މި ވައިރަސް އަކީ އޭގެ ހޯސްޓް ކަމަށްވާ ފްރޫޓް ބެޓްސް އިން ޖެހޭ ބައްޔެކެވެ. އޭގެ ފަހުން މައިގަނޑު ގޮތެއްގައި މި ބަލީގެ ކޭސްތައް ފެންނަނީ، ބަންގްލަދޭޝް އާއި އިންޑިއާގަ އެވެ.
އެހެންވެ، ތައިލެންޑް، ނޭޕާލް އަދި ތައިވާން ފަދަ ގައުމުތަކުން މިހާރު ވަނީ އިންޑިއާއިން އަންނަ ފަސިންޖަރުން ސްކްރީން ކުރަން ފަށާފަ އެވެ. އިންޑިއާގެ ހުޅަނގު ބެންގާލްގައި މި ބަލި ފެނުނީ އެ ސަރަހައްދުގެ ހޮސްޕިޓަލަކުންނެވެ. ބަލި ޖެހުނު މީހުންގެ ތެރޭގައި ޑޮކްޓަރަކާއި ދެ ނަރުހުން ހިމެނޭއިރު، މިކަމާ ގުޅިގެން 100 އެއްހާ މީހުން ވަނީ ކަރަންޓީނުކޮށްފަ އެވެ.
ދުނިޔޭގެ ސިއްހަތު ޖަމްއިއްޔާއިން ނިޕާ ވައިރަސް ސިފަކޮށްފައިވަނީ ބޮޑު ބަލިމަޑުކަމަކަށް ބަދަލުވުމުގެ ފުރުސަތު އޮތް ނުރައްކާތެރި ބައްޔެއްގެ ގޮތުގައެވެ. މި ބަލި ޖެހުމުން ފެންނަ އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ނޭވާލާން އުނދަގޫވުމުގެ އިތުރުން ސިކުނޑި ދުޅަވުން ހިމެނެއެވެ.
