މާލެއާ އެއް ފެންވަރަކަށް އަތޮޅުތެރޭގަ ވެސް ތައުލީމީ ދާއިރާ ތަރައްގީކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިފަދައިން ވިދާޅުވީ، ޝަހީދު އަލީ ސްކޫލު ހުޅުވުމަށްޓަކައި މިއަދު ބޭއްވި ރަސްމިއްޔާތުގައި ވާހަކަދައްކަވަމުން ނެވެ. އެމަނިކުފާނު ވިދާޅުވި ގޮތުގަ ރަށްރަށުން މާލެއަށް ކިޔަވަން އަންނަ ކުދިންގެ އަދަދު މި އަހަރު އެކަނި ބެލިޔަސް ގިނަ ކަމަށެވެ. އެގޮތުން، މި އަހަރު އެކަނިވެސް 1،500 ދަރިވަރުން ރަށްރަށުން މާލެ ބަދަލުވިކަން ފާހަގަކުރައްވަމުން ރައީސް ވިދާޅުވީ އެ އަދަދުތަކުން ހާމަވަނީ ރަށްރަށުގައި މާލެއާ އެއް ފެންވަރަށް ތައުލީމީ ފެންވަރު ނެތް ކަމަށެވެ.
"1،500 އަށް ވުރެ ގިނަ ކުދިން، އޭގެ މާނައަކީ 5،000 އަށް ވުރެ ގިނަ ފަރާތްތައް މިވަނީ ރަށްރަށުން މާލެ ބަދަލުވެފައި ސްކޫލުތަކަށް ކުދިން ވައްދަން. އޭގެ މާނައަކީ ރަށްރަށުގައި ނެތިއްޔޭ އަދިވެސް މާލޭގައި މި ހުންނަ ފެންވަރަށް ތައުލީމީ ފެންވަރު ގާއިމް ކުރެވިފައި." ރައީސް ވިދާޅުވި އެވެ.
މީގެއިތުރުން ރައީސް ވިދާޅުވީ، އުނގެނުމަށް ހުރި ހުރަސްތައް ނައްތާލައި، ހުރިހާ ދަރިވަރުންނަށް ހަމަހަމަ ގޮތެއްގައި ތައުލީމު ލިބޭނެ ގޮތް ފަހިކޮށްދޭ އިންކްލޫސިވް ތައުލީމު ފޯރުކޮށްދިނުމަކީ މި ސަރުކާރުގެ ސިޔާސަތެއް ކަމަށެވެ. އެގޮތުން އަތޮޅުތެރޭގެ ތައުލީމީ ނިޒާމު ހަރުދަނާ ކުރުމުގެ އިތުރުން، ނަފްސާނީ ގޮތުން ކުދިންގެ ތައުލީމީ ބިންގާ ހަރުދަނާކުރުން ކަށަވަރުކުރުމަކީވެސް ކޮންމެ މުދައްރިސެއް އަދި ބެލެނިވެރިއެއް ވާޖިބެއްކަމަށް ރައީސް ވިދާޅުވި އެވެ.
2023 ވަނަ އަހަރުގެ ޑިސެމްބަރު މަހުގެ 23 ވަނަ ދުވަހު ބިންގާ އެޅި ޝަހީދު އަލީ ސްކޫލްގެ މަސައްކަތް އެއްކޮށް ނިންމާފައިމިވަނީ ދެ އަހަރެއްހާ ދުވަހުގެތެރޭގަ އެވެ. 1900 އަށްވުރެ ގިނަ ދަރިވަރުންނާއެކު މިއަދު ކިޔަވައިދޭން ފެށި ޝަހީދު އަލީ ސްކޫލްގައި 230 މުދައްރިސުން ކިޔަވައިދޭނެ އެވެ. މި ސްކޫލްގައި މަލްޓިޕާޕަސް ހޯލަކާއި، ޒަމާނީ ވަސީލަތްތަކުގެ އިތުރުން ޓާފްދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމްތައް ވެސް ވަނީ ހަމަޖައްސާފަ އެވެ. މި ސްކޫލަކީ 1،500 ކުދިންގެ ޖާގައިގެ ސްކޫލެއް ނަމަވެސް ދެ ދަންފަޅިއަށް ކިޔަވައިދޭނަމަ 2500 ކުދިންނަށް ކިޔަވައިދެވޭނޭކަމަށް އެޑިއުކޭޝަން މިނިސްޓްރީިން ބުންޏެވެ.
ގްރޭޑް 1-10 އާ ހަމައަށް ކިޔަވައިދޭން ނިންމާފައިވާ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެ އެވެ. އަދި 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރު ލެބާއި 3 ސައިންސް ލެބްވެސް ހިމެނޭނެ އެވެ.
